Брисел ќе ја чека Македонија до јуни



Министрите за надворешни работи на Европската унија в понеделник во Луксембург нема да носат заклучок за Македонија

Министрите за надворешни работи на Европската унија в понеделник во Луксембург нема да носат заклучок за Македонија, а расправата за тоа и одлуката ќе ги одложат за јуни. Вака денеска информираа извори од ирското претседателство, не сакајќи да прогнозираат воопшто има ли шанси или не на самитот на Унијата во јуни вооопшто да се стави на дневен ред одлука за започнување на преговори со нашата земја.

„Расправа за извештајот за Македонија ќе има, ама нема да има одлука, бидејќи таа се одлага за јуни“ - е пораката од овие извори, што практично сугерира дека Брисел ќе не чека до последен ден да напавиме нешто, па ќе ни пресуди. На директното прашање има ли шанси земјата во јуни да добие одлука за преговори, одговорот бил дека сега е прерано да се каже било што и треба да се почека до следниот министерски состанок или самит.

На дневен ред во понеделник ќе биде и одлуката дали да и се дадат преговори на Србија, но и околу оваа земја се најавува дека одлуката веројатно ќе биде одложена, бидејќи преговорите на Белград со Приштина се уште траат и Ивица Дачиќ и Хашим Тачи, според најавите, не се враќаат од Брисел додека не се исцрпат шансите да се постигне договор. „Се е во воздух“, бил краткиот коментар околу шансите Србија во понеделник да добие најава или датум, со дополнување дека ако е позитивен резултатот од преговорите, ќе има политичка порака за Белград.

Наспроти политичкото мртвило од Македонија, од каде што не стигаат најави ни за формирање на анкетната комисија а не пак за решавање на некое спорно прашање, Белград со сета енергија води преговори во Брисел, па може да се случи она што не верувавме дека некогаш ќе се случи - Србија да добие датум а Македонија само оддолжување. (С.Ј.)