19.04.2013, 13:08 Владата ќе вработува 1.800 лица од социјални семејства
Работодавците ќе добиваат субвенции од по 200 евра за секој работник
Владата ќе поддржи 1.800 нови вработувања на млади лица од социјално ранливи семејства. Огласите ќе се објавуваат од следниот месец, па на секои два месеца, а вработувањата ќе се реализираат кај работодавци кои ќе поднесат барање до Агенцијата за вработување. Оваа нова мерка вчера ја објасни портпарол Александар Ѓорѓиев. Тој додаде дека се предвидени од 1.500 до 1.800 вработувања на лица на возраст од 19 до 29 години. За таа цел Владата ќе издвои три милиони евра во првите три години од имплементацијата.
„Работодавецот ќе ја добива субвенцијата во период од шест месеци со обврска лицето кое е вработено преку оваа м��рка да го задржи уште дополнителни шест месеци. Поддршката за работодавецот изнесува 14.000 денари за задоволување на бруто-платата и дополнителни 3.000 денари кои ќе бидат искористени за доквалификации“, посочи Ѓорѓиев.
Приоритет за субвенционирање ќе имаат лицата кои во текот на оформувањето на своето средно образование го користеле условниот паричен трансфер на Владата во висина од 12.000 денари на годишно ниво, но програмата ќе важи и за оние кои не користеле ваква поддршка. За имплементација на оваа владина мерка ќе бидат задолжени подрачните канцеларии на Агенцијата за вработување и центрите за социјална работа.
„Првиот оглас ќе се објави во почетокот на мај, а работодавецот ќе може да аплицира ако ги има намирено сите обврски кон државата. Агенцијата за вработување ќе го направи поврзувањето на барањата на фирмите за нови вработувања, а финалниот избор ќе биде оставен на фирмите“, рече Ѓорѓиев. (Ек.Р.)
|
