(ВИДЕО) Слободан Богоевски уапсен за перење пари

Во акцијата „Агент“ шестмина се осомничени дека во 2009 година направиле злоупотреби од над еден милион евра

Љубиша Станковиќ

Поранешниот директор на Бирото за државна безбедност Слободан Богоевски (63), двајца адвокати и управителка на фирма се уапсени поради наводни малверзации со купопродажни договори за земјиште во близина на Спортскиот центар „Борис Трајковски“ во Скопје. Полицијата се' уште трага по еден македонски и еден словенечки државјанин. Шестмината осомничени, според МВР, во 2009 година направиле кривично дело – перење пари во износ од над еден милион евра. 

Во полициска акција наречена „Агент“, вчеравечер во Дебар Маало, во неговиот дом е приведен Богоевски, а на истражните органи денеска беа предадени и адвокатите Васко Томановиќ (39) и Владимир Пешликоски (43), како и управителката Даниела Трајковска (30). Полицијата се' уште трага по Ален Јегени (29) и Митја Валич.

Шестемина осомничени се товарат за перење пари и други приноси од казниво дело, фалсификување исправа, употреба на исправа со невистинита содржина и злоупотреба на службената положба и овластување.

Од досегашната полициска истрага било утврдено дека малверзациите со откуп на државно градежно земјиште почнале уште во 2000 година кога како заинтересирани за купување на земјиштето, кај СЦ „Борис Трајковски“, со површина од 19.000 квадратни метри, се јавила кипарската фирма „Централ Балкан инвестмент - ЦБИ“, од Никозија.

Фирмата што ја застапувал адвокатот Томановиќ по цели девет години проблеми се откажала од купување на земјиштето и покрај тоа што се работело за сума од 62.855.196 денари, а за таа цел бил потпишан и договор со Министерството за транспорт и врски. И покрај тоа што договорот бил раскинат, тоа не му пречело на адвокатот, три месеци порано, да формира фирма која ја нарекол „Централ Балкан инвестмент ДООЕЛ“, со седиште во Скопје. Всушност, само еден ден по раскинувањето на договорот, на 4 март 2009 година, во игра за купување на земјиштето влегува фирмата „Инвестмент интернешенел“. Станува збор за компанија која е во сопственост на словенечки „Меркатор“, а која била управувана од сега осомничениот Митја Валич.

Словенечката компанија го купила земјиштето, но парите никогаш не легнале на фирмата од Кипар, туку на онаа која имала слично име и е со седиште во Скопје, а со која раководел Ален Јегени.

Откако парите легнале на сметката на скопската фирма, се пристапило кон склучување невистинити договори за наводно посредување. Договорите биле потпишани со фирмата „Интерпарт ком ДООЕЛ Скопје“, сопственост на адвокатот Пешликоски и со која управувала пријавената Трајковска.

Врз основа на вака склучените договори, на лична сметка на ексдиректорот на ДБК, Слободан Богоевски, во јули 2009 година, во два наврата биле префрлени 28.670.000 денари. Дел од средствата, односно 17,5 милиони денари, Богоевски ги подигнал во кеш, а потоа на сметката вратил 2,86 милиони, каде што останале осум милиони денари.

Осомничениот адвокат ваков договор склучил и со фирмата „Интерпарт ком“, но на оваа фирма и' биле префрлени 24,260 милиони денари. Управителката на фирмата, за да го реализира договорот, склучила договор со адвокатот кој е и сопственик на компанијата и кој требало да посредува во раскинувањето на договорот. За таа цел нему му биле префрлени 17.940.900 денари.

Во МВР велат дека со раскинувањето на договорите државата не претрпела штета, но дека постапиле по мислење на Обвинителството, кое смета дека во случајов има перење пари.