Жерновски прогласи победа во Центар



Од опозицискиот штаб триумфално јавија дека Жерновски го победил Тодоровиќ со 3038 гласови разлика

ФОТО: Киро Попов

Андреј Жерновски прогласи победа по трет пат во општина Центар. Резултатот од прегласувањето повторно е во полза на опозицискиот кандидат. Вкупниот број на гласови што ги освои тој во местата на прегласувањето изнесуваше 14.566 а кандидатот на ВМРО-ДПМНЕ актуелниот градоначалник Владимир Тодоровиќ 11.760. Во овој збир недостасуваат гласовите од избирачкото место на Водно, но од опозицискиот штаб триумфално јавија дека Жерновски победил со 3038 гласови разлика.

Возбуден од убедливата победа, Жерновски се заблагодари на целосната поддршка која ја имал денеска о�� колегите пратеници од опозицискиот блок, но и од дипломатскиот кор, кои, како што рече, ја штителе демократијата на гласачките места.

„Мојата победа е изборена по трет пат со тоа што во првиот круг противкандидат на граѓаните им беше Владимир Тодоровиќ, во вториот круг Никола Груевски, а денеска противник на власта и беше народот. Оваа победа е јасен доказ дека волјата на народот насила никој не може да ја смени . Многу му благодарам на лидерот на СДСМ, Бранко Црвенковски, чии драгоцени совети доведоа до оваа наша заедничка победа", изјави Жерновски.

Шефот на изборниот штаб на здружената опозиција Игор Ивановски им се заблагодари на граѓаните кои покажале и докажале, како што рече, дека победата во Центар е победа на граѓаните кои се за подобра иднина.

„Вчера и денеска владата со разни малверзации и трикови прво ги убедуваше граѓаните дека нема изори, а потоа ги саботираше и повторно ги употреби фантомските гласачи од Мала Преспа. Сето тоа им беше бадијала, народот победи и Жерновски е новиот градоначалник на скопската општина Центар“рече Ивановски.

Во штабот на Жерновски се сите пратеници од СДСМ, Црвенковски, Ристо Пенов и поранешниот лидер на ЛДП, Јово Манасиевски.