Србија и' одржа лекција на Македонија

Нашата земја не беше ниту спомената во Луксембург

Слободанка Јовановска

Србија ни одржа лекција од политички прагматизам и визија, и по тешки упорни повеќемесечни преговори, вчера успеа да добие препорака за датум за преговори со Европската унија, која за разлика од нашата што се повторува петпати, може и да се оствари. Министрите за надворешни работи на ЕУ вчера од Луксембург го поздравија како голема храброст постигнувањето на договорот меѓу Белград и Приштина околу Северно Косово, а бидејќи потврдата за него стигна кога и тие на состанокот, одлуката за почнување преговори ја најавија за самитот на ЕУ во јуни. Македонија на прес-конференцијата по состанокот не беше ни спомената, освен информативно, дека и за неа еврокомесарот Штефан Филе поднесол извештај кој ќе се разгледува во јуни.

„Ова е историски ден за Србија, за Косово и за цела Европа“, оцени ирскиот претседавач Емон Гилмор, одавајќи им признание за политичка храброст на двете држави. Филе од своја страна нагласи дека договорот немало да биде можен без храброста и политичка решеност што лидерите ја покажале за време на тешките преговори, информирајќи дека утрото препорачал преговори, за членство со Србија и за Спогодба за асоцијација и стабилизација со Косово. „Тие докажаа дека можат да се фокусираат на иднината место да останат заглавени во минатото и затоа заслужуваат да тргнат одлучувачки кон ЕУ“, рече Филе додавајќи дека Србија ги исполнила политичките критериуми за тоа.

Таков одек српско-косовскиот пробив имаше и во Македонија, но вчера немаше кој да каже зошто од наша страна нема ни храброст ни визија да се реши спорот што ја блокира Македонија, бидејќи цел државен врв одговорен за надворешната политика беше на пат. Формално одлуката за почнување преговори на Македонија со ЕУ е одложена за јуни, но изгледите тоа да се случи според бриселски оцени се многу црни. Пробивот на Србија и Косово се гледа веќе како можно потсетување до нашата Влада дека може да има корист од политичкиот дијалог, иако кај нас веќе се вадат аргументи дека нашиот спор нема иста политичка тежина како на Белград и Приштина, бидејќи е ирационален, а Грција е земја членка, а не рамноправен преговарач. Додека кај нас фокусот на проблемот е во името, во Брисел тој се поместува во однос на политичките критериуми, без чие исполнување успехот на Србија ќе ни стане недостижен сон. Ако Белград во јуни добие датум а Македонија не, тогаш нашето одбројување треба да почне наопаку, со акцент на земјите кои, како и ние, немаат шанси за напредок во евроинтеграцијата.