Изет Зеќири се повлекува од пратеничкото место

Изет Зеќири поднесе оставка од пратеничката функција, како морален чин, поради неуспехот на локалните избори, на кои тој учествуваше како кандидат на Националната демократска преродба (НДП) за градоначалник на Тетово.

Зеќири, кој е доктор по економски науки, во изминатите околу две години, се наметна како еден од најактивните опозициски пратеници. Во образложението на оставката, тој наведува дека си заминува од парламентот од етички причини, бидејќи како кандидат за градоначалник не успеал да обезбеди соодветна поддршка од граѓаните на Тетово.

„Имајќи ги предвид изборните резултати, и покрај фактот дека перманентно и максимално се ангажирам за заштита на правата и интересите на моите сограѓани, сметам дека немам политички легитимитет и кредибилитет да ги преставувам граѓаните на Тетово во Собранието на Македонија“, вели Зеќири.

Неговата битка за градоначалничка функција заврши во првиот изборен круг. Зеќири наведува дека, поради изборниот пораз, од наредниот месец нема да учествува во работата на парламентот и дека на негово место ќе дојде друг кандидат од листата на НДП. (П.Р.)