21.04.2013, 15:04 Се намалиле работниците со скратено работно време
Се намалува бројот на работодавачи кои имаат работници со скратено работно време. Минатата година кај 9.281 работодавач со 83.659 вработени со скратено работно време работеле 20.260 лица или 24,5 отсто од вработените. Денес, пак, бројот на работодавачи кои имаат работници со скратено работно време е намален на 8.468 компании.
Според директорот на Управата за јавни приходи Горан Трајковски бројот на вработени е зголемен од 83.659 на 88.436, а бројот на вработени со скратено работно време од 20.260 се намалил на 16.671, односно за 6,5 проценти. Тој нагласи дека најголем број вработени со скратено работно време има во трговијата на мало, дејности за подготовка на оброци и служење на храна и оти тие се целни групи на посебна следење.
Министерот за труд и социјална политика Спиро Ристовски информира дека од 599 извршени инспекциски надзори на Државниот инспекторат за труд кај работодавачи кои имаат вработено 4.505 работници со скратено работно време, кај 116 работодавачи констатирани се неправилности со неводење или неправилно водење на евиденција за работното време на работниците. Најчесто работниците рабоеле подолго од договореното или не се евидентирала и не се исплатувала прекувремената работа.
Ристовски ги повика вработените кои се соочиле и со прекршувања на Законот за минимална плата, односно на кои што не им бил исплатен минималниот износ да пријават до Државниот инспекторат за труд, електронски преку интернет страницата, телефонски, на броевите 15 131 и 15 505, или пак по пошта, за да може инспекцијата да постапи согласно законските прописи. (Ек.Р.)
|
