„Скопје 2014“ чини 207 милиони евра

Владата потрошила 80 милиони евра, Општина Центар околу 55 милиони, а Министерството за култура околу 72 милиони евра

БОЈАН ШАШЕВСКИ

„Вкупниот износ на проектот ’Скопје 2014‘ изнесува 207 милиони евра. На годишно ниво за капитални инвестиции, проектот во 2008 година изнесувал 0, 5 отсто од вкупниот буџет на Македонија, за наредната 0,76 отсто, за 2010 година 1,1 отсто, за 2011, 2,2 отсто, за 2012, 1,6 отсто и за 2013 година 1,5 отсто. Овие проекти веќе даваат резултати, обезбедиле работни места на 1.000 работници и семејства, а со изградбата на објектите се оствариле и заштеди по основ на кирии“.

Ова вчера го рече министерката за култура, Елизабета Канческа – Милевска на прес конференцијата со која ��еше даден отчет за владиниот проект „Скопје 2014“. Таа рече дека „Скопје 2014“ се покажал како проект од повеќекратна корист - обезбедил модерен изглед на главниот град и го раздвижил градежништвото и 26 други гранки. Обезбедил раст на градежништвото за 3,6 отсто а бројот на туристи се зголемил за 54 проценти.

Деталниот отчет се одржа на маратонска конференција во владината зграда, каде се сумираа бројките врзани со зафатите на контроверзниот проект на Министерството за култура, владината Служба за општи и заеднички работи и на Општината Центар. До денеска Владата не проговори колку точно пари се потрошиле за „Скопје 2014“. Единствено околу 80 милиони евра беа изнесени на првичните конференции кога се презентираше изгледот на проектот кој го смени ликот на централното подрачје.

Според вчера објавените информации, Владата преку Службата за општи и заеднички работи потрошила 80 милиони евра, Општина Центар околу 55 милиони евра, а Министерството за култура околу 72 милиони евра. Во проектот Скојпе 2014 се опфатени над 70 проекти, меѓу кои спомениците низ градот, повеќе згради, мостови, реконструкција на фасади и слично.

Министерство за култура за проектот 33 скулптури во централното подрачје потрошило нешто над 885.000 евра. Тука се вклучени скулптурите „Бик“, „Семејство“, „Маски“, „На кафе“, „Чистач на кондури“, „Набљудувач“, „Риба, „Жена со гитара“, „Тешкото“, „Шмизла“, „Просјак“, „Починка“. Трите врби на Вардар чинат точно 278.188 евра, а Портата „Македонија“ 5.192.364 евра.

„За Музејот на македонска борба за државност и самостојност, односно за Музејот на ВМРО и Музејот на жртвите од комунистичкиот режим биле издвоени 13.346.969 евра, за Стариот театар 36.846.520 евра, додека за концертната сала на Македонската филхармонија се исплатени 5.150.916 евра“, рече Канческа – Милевска, дополнувајќи дека Министерството за култура вршело заеднички работи за Археолошкиот музеј во вредност од 8.174.494 евра и го доградува Собранието - 9.569.106 евра.

Службата за општи и заеднички работи е задолжена за објектот на Министерството за внатрешни работи вреден 19.251.506 евра, зградата на Уставниот суд, Археолошкиот музеј и Државниот архив за која се потрошени 29.722.114, а за Финансовата полиција 13.744.848 евра. Тука се вклучени анекси, дополнителни договори за проектантски и стручен надзор, за релјефи, за занаетчиско и ентериерски работи.

За Александар Македонски 10,49 милиони евра

„Владата за ’Скопје 2014‘ на Општина Центар и' дала 41 милиони евра, но оваа сума се зголемила за дополнителни 63 милиони евра со анекс договори“, рече вчера Владимир Тодоровиќ. Од овие пари, 10,49 милиони евра се потрошени само за споменикот на Александар Македонски. Вкупно 649.000 евра на име авторски хонорар добила авторката Валентина Стевановска за своето дело „Коњаник“, но, во оваа сума не биле вкалкулирани и трошоците за материјал, работници, комуналии, моделирање, струја, лиење во гипс и лиење во полиестер.

За спомениците на Гоце Делчев и Даме Груев се потрошени 1,54 милиони евра, а авторот Жарко Башевски добил 68.000 евра хонорар, а за сите трошоци добил 310.000 евра. Богоја Анѓелковски, пак, добил 35.000 евра за споменикот на Никола Карев“, рече Тодоровиќ.

За двата лава пред мостот „Гоце Делчев“ спроти Владата, Дарко и Елена Дуковски добиле 15.000 евра, а за сите трошоци за овие споменици се потрошени 1,52 милиони евра, додека Константин Јанев за лавовите од другата страна на мостот добил 12.000 евра хонорар.

Споменикот на Цар Самоил чини 1,7 милиони евра, на Ченто еден милион, за Цар Јустинијан се потрошени 1,8 милиони, додека споменикот на Гемиџиите чинел 1,45 милиони евра. Споменикот на Паднатите херои на Македонија во паркот „Жена борец“ чинел 2,9 милиони евра, на АСНОМ чини 2,2 милиони евра, а помеѓу поевтините, односно 263.000 евра е споменикот на Свети Климент, додека 383.000 евра се одлеале за споменикот на „Македонските бранители“.