Џохар Царнаев го обвини брат му за организирање на бостонските напади

Американските власти уапсија уште двајца Казахстанци осомничени за поврзаност со експлозиите во Бостон

Џохар Царанев, осомничениот за нападот на Бостонскиот маратон, го обвини својот убиен брат Тамерлан дека го организирал нападот и отфрли секаква поврзаност со некоја меѓународна терористичка организација.

Неименуван извор од истрагата за американската ТВ мрежа Си-Ен-Ен изјави дека прелиминарните разговори со осомничениот укажуваат дека браќата се радикални џихадисти.

Џохар Царнаев, ранет и задржан на лекување во бостонска болница, изјавил дека него��иот брат Тамерлан, кој беше убиен во петокот, сакал да го одбрани исламот од напад, рече неименуваниот избор.

Преживеаниот Царнаев во истрагата кажал и дека ниту една меѓународна терористичка група не учествувала во нападот, пренесуваат американските медиуми.

Официјалните претставници пренесуваат дека прелиминарите докази укажуваат дека браќата Царнаев биле мотивирани од религиски екстремизам, но дека не биле поврзани ниту со една исламистичка терористичка органзиација.

Џохар (19) се соочува со смртна казна доколку пред федералниот судија биде прогласен за виновен по обвинението за користење на оружје за масовно уништување.

Уапсени уште двајца Казахстанци осомничени за експлозиите во Бостон

Двајца Казахстанци, уапсени во САД за прекршување на визниот режим, можеби ги познавале осомничените за бомбашките експлозии на Бостонскиот маратон, изјави казахстанското Министерство за надворешни работи, цитирано од американските медиуми.

Според министерството, американските власти во саботата ги привеле студентите, додека ја барале можната врска и контакти со Џохар Царнаев, едниот од двајцата браќа, осомничени за нападите во Бостон. Тој учел на Масачусетс универзитетот во Дартмут. Другиот брат, Тамерлан Царнаев, загина во петокот во престрелка со полицијата.

Министерството соопшти дека казахстанскиот конзул е во Бостон за да воспостави контакт со уапсените и нивните семејства.

Двајцата браќа Царанев се чини дејствувале водени од религиозни побуди, но нема податоци дека биле поврзани со исламска терористичка група, изјавија американски службеници, цитирани од американските медиуми.

Џохар Царнаев (19), кој е ранет и се наоѓа во болница во Бостон, вчера беше обвинет од американското Федерално обвинителство за употреба на оружје за масовно уништување со цел убиство и ако биде прогласен за виновен може да биде осуден на смрт.

Меѓу доказите претставени од обвинителството при покренувањето на обвиненијата против Џохар Царнаев, беа записи од камери за набљудување, на кои се гледа како тој остава ранец на местото на втората експлозија на Бостонскиот маратон и како користи мобилен телефон. Неколку секунди подоцна на неколку метри од таму избувнува првата експлозија, што внесува хаос меѓу луѓето што биле наоколу, но Царнаев изгледа спокоен и брзо тргнува некаде. Десетина секунди потоа на местото каде тој го оставил ранецот, избувнува и втората експлозија.

Мајката на двајцата браќа, Зубејдат Царанева, изјави дека телефонски разговарала со поголемиот син пред престрелката со полицијата.

Таа за американската телевизија Еј-Би-Си изјави дека Тамерлан и се јавил и и кажал: „Полицијата почна да пука по нас, таа не следи“. Тој и кажал дека е заедно со помалиот брат Џохар. Исто така, тој и кажал дека ја сака, по што врската била прекината.