Од идната година, Царина ќе ги наплаќа акцизите
Преземањето на наплатата од УЈП е еден од главните услови што ги наметнува ЕУ
Александрија Стевковска
Од почетокот на идната година, наплаќањето на акцизи од УЈП ќе премине во рацете на Царината, предвидува Законот за акцизи, кој вчера го помина првото собраниско разгледување. Преземањето на наплатата на акцизите на Царината од УЈП е еден од главните услови што ги наметнува ЕУ за старт на преговорите за членство на земјава во Унијата. Кај нас преминувањето на надлежноста од УЈП во рацете на Царината бараше политичка волја и тоа најмногу поради бројните законски измени што треба да се направат, но и поради фактот дека за спроведување на иницијативата се потребни бројни организациски измени.
Засега управувањето со акцизите е регулирано со Законот за акцизите и Правилникот за спроведување на Законот за акцизите, според кои надлежни институции за наплата на акцизните давачки се Управата за јавни приходи и Царинската управа. Од причина што нема регулативи во европското законодавство кои определуваат која институција ќе управува со акцизите, секоја земја носи одлука која од управите ќе ја има надлежноста во однос на наплатата и администрирањето со акцизите, односно тоа е национална одлука на земјите-членки на ЕУ.
Согласно со законските измени што се на маса на пратениците, Царината во свои раце ги презема печатењето, чувањето и издавањето на контролните марки за алкохолот, како и за тутунските преработки. Производителот, односно увозникот, малопродажната цена на тутунските добра ќе ја пријавува во Царинската управа. Во случај на недозволено зголемување на малопродажната цена на тутунските добра над пријавената, настанува акциза во висина на разликата од акцизното оптоварување пред и по зг��лемувањето на цената. Пуштање тутунски добра во акцизно-правен слободен промет под и над пријавената малопродажна цена во Царинската управа не е дозволено. Самите акцизни добра, обележани со контролни марки подигнати до 1 мај 2009 година, остануваат во акцизно-правен слободен промет најдоцна до 30 април 2010 година. Се предлага старите контролни марки да се заменат со нови контролни марки, а замената ќе ја врши Царинската управа во периодот од 1 мај 2010 година до 31 октомври 2010 година.
Други измени што се предвидуваат се акцизната дозвола, наместо УЈП, да ја издава Царината во рок од два месеца од денот на приемот на барањето.Имателот на акцизна дозвола, наместо во УЈП, тримесечниот попис на залихи, известувањето за сите измени на податоци наведени во барањето за акцизна дозвола, статусни промени, проширување, ограничување или напуштање на дејност или основање и функционирање нови акцизни складови ќе доставува во Царинската управа.
Согласно со измените, лицата кои течниот нафтен гас го употребиле како погонско гориво, како и лицата што го употребиле како додаток на друго минерално масло како погонско гориво, во индустријата, ќе добијат назад 80 отсто од пропишаната акциза за погонска намена. |
