„Нисан“ отвора нови 350 работни места во Британија
Лондон - Автомобилската фабрика „Нисан“ во англискиот град Сандерленд соопшти дека овој погон на јапонската компанија ќе произведува специјални акумулатори за идните електрични автомобили. Новата фабрика за акумулатори ќе овозможи отворање дополнителни 350 нови работни места. Фабриката во Сандерленд успеа да понуди најдобри услови и да ја добие инвестицијата на интерното натпреварување меѓу сите фабрики на „Нисан“ во Европа. Јапонската компанија ќе инвестира 200 милиони фунти во следните пет години во новиот проект, се вели во соопштението на управата на фабриката во Сандерленд. Британскиот премиер Гордон Браун го пофали новиот проект на јапонската компанија, објаснувајќи дека станува збор за „значајна новина“ за локалната економија во североисточниот дел на Англија. Автомобилската индустрија во Велика Британија е една од најтешко погодените од кризата. (МИА) | 
