Не е време за приватизација на ЈАТ
Во компанијата има вишок луѓе и недостиг од пари, па прашање е кој би се заинтересирал за неа
Неопходна е нова флота за закрепнување на „ЈАТ ервејз“, оцени Милан Јовановиќ, претседател на Синдикатот на пилотите во српската државна авиокомпанија.
Тој рече дека обновата на флотата е неминовна, бидејќи авионите на ЈАТ се користат долга низа години, така што се потребни поголеми вложувања за да се одржи безбедноста на леталата отколку кај новите.
Јовановиќ оцени дека во овој момент приватизацијата би била погубна за „ЈАТ ервејз“.
„Ништо не е регулирано. Се јавуваат вишок луѓе, а недостиг од пари. Неопходно е да се доведе тоа во ’норма‘ за да биде некој заинтересиран да ја купи компанијата“, наведе претседателот на самостојниот Синдикат на сообраќајните пилоти на Србија.
Во „ЈАТ ервејз“ моментно има околу 160 капетани и копилоти, што е оптимален број пилоти за постојната флота на компанијата. Јовановиќ прецизира дека бројот на пилоти во компанијата е намален за околу 60. Максималната заработувачка на пилотите во „ЈАТ ервејз“, во сезона и со сите додатоци и дневници, според него, се движи до 3.000 евра месечно, но како што истакна, таа може драстично да падне надвор од сезона, бидејќи се лета помалку.
Положбата на пилотите во „ЈАТ ервејз“ моментно е солидна, меѓутоа пилотите заминуваат заради подобри услови во други компании во регионот, каде што платите се два и повеќе пати поголеми отколку во ЈАТ. „Доколку дојде до проширување на флотата, на ’ЈАТ ервејз‘ ќе му бидат потребни нови, млади луѓе“, рече Милан Јовановиќ, кој е капетан и инструктор по летање на авион од видот „АТР 72“. Тој наведе дека старосната структура на пилотите во ЈАТ е таква што повеќето капетани треба да работат од пет до 10 години до пензија, но, како што додаде, дел од кадарот за летање е обновен. Најголема вредност во секоја авиокомпанија се вработените, истакна тој, додавајќи дека авионите може да ги купи секој, но прашање е дали може да обезбеди квалитетен кадар.
На прашењето што би требало да се направи, покрај обновата на флотата, за закрепнување на „ЈАТ ервејз“, Јовановиќ рече дека државата Србија, како сопственик на компанијата, би требало да „биде посериозна и да се изјасни што сака“. „Ако сака компанија, тогаш мора да знае што би требало да се направи. Постојат примери на успешни авиокомпании во светот и се знае колку вработени се потребни за одреден број седишта во авионите. Ако се надмине таа мерка, се зголемуваат издвојувањата за плати и се намалува износот на средствата за вложување во флота и обука на персоналот“, истакна тој. (Блиц прес) |
