Би-Би-Си ќе прави репортажа за Македонија и за Крушево
Лондон - Телевизиска екипа на Би-Би-Си ќе престојува една недела во Македонија за да направи репортажа за земјата, за Крушево и за неговата етноманифестација, што е во тек. Репортерите на оваа најголема британска јавна медиумска компанија ќе ги снимаат градот, неговите природни убавини и туристички можности, како и културно-историските знаменитости.
Екипата ќе престојува во Крушево во деновите на манифестација „Крушево - етноград“, што беше отворена во неделата, како и непосредно пред традиционалното одбележување на годишнината од Илинденското востание на 2 август 1903 година.
Според најавите од Би-Би-Си, репортажата за Македонија и за Крушево се очекува да биде емитувана во средината на август на сателитскиот канал Би-Би-Си ворлд.
Репортажата е подготвувана заеднички меѓу Би-Би-Си и Меѓународната канцеларија за економска промоција на Македонија во Велика Британија, во Ирска и во Исланд, со седиште во Лондон. Раководителот на канцеларијата, Коста Котески, изјави дека проектот на британската медиумска компанија е убава можност за нова светска промоција на Македонија, затоа што програмата на Би-Би-Си ворлд ја гледаат над 75 милиони луѓе. (МИА)
|
