Претходен број

Светските медиуми испратија лоши вести за изборите во Македонија

Светскиот сервис Би-Би-Си јавува дека премиерот Никола Груевски прогласи победа на парламентарните избори во Македонија.

Би-Би-Си информира дека по пребројувањето на повеќето гласачки ливчиња Груевски прогласил победа на неговата партија, и воедно изразил жалење за насилството до кои дојде денеска.


Би-Би-Си потестува дека до предвремените избори дојде откако Грција го блокираше влезот на Македонија во НАТО поради разликите околу името.

Француската агенција Франс-прес јавува дека македонскиот премиер Груевски прогласил победа на неговата десноориентирана партија ВМРО-ДПМНЕ.

АФП пренесува дека според изјавата на Груевски, ВМРО-ДПМНЕ обезбедила двојно повеќе мандати од ривалскиот Социјалдемократски сојуз. АФП наведува дека симпатизерите на партијата веќе се излезени во центарот на Скопје каде со веење македонски знамиња, пеење, и честитајќи си еден на друг, ја прославуваат победата, која се уште не е потврдена и од Државната изборна комисија (ДИК).

АФП истакнува дека Груевски се одлучил на предвремени избори во надеж дека ќе обезбеди апсолутно мнозиство за ВМРО-ДПМНЕ откако „владејачката коалиција беше доведена под знак прашање“ откако земјата не влезе во НАТО.

АФП исто така го пренесува сочуството кое Груевски го изрази до семејствата на жртвите од денешните инциденти. Тој исто така наведе дека ќе има прегласување на сите избирачки места каде се забележани нерегуларности бидејќи секој пратеник во Парламентот мора да биде избран на фер и чесен начин.

Британската агенција Ројтерс под наслов „Македонскиот премиер прогласи изборна победа, жали за насилствата“ известува за крајот на денешниот изборен ден во Македонија.

Јавувајќи за изборната победа на ВМРО-ДПМНЕ, Ројтерс коментира дека прва задача на Груевски ќе биде да ги смири тензиите меѓу ривалските албански партии и да ја поправи штетата нанесена на имиџот на државата која се обидува да се приклучи кон Европската унија докажувајќи дека е доволно зрела и демократска да почне преговори за членство.

Американската новинска агенција Асошиејтед прес наведува дека македонскиот премиер прогласи победа на изборите, која беше засенета од пукотници кои резултираа со смртта на едно лице. АП пишува дека ДИК се уште нема конечни резултати, но оти според првичните, ВМРО-ДПМНЕ има голема предност пред опозициските Социјалдемократи.



Бугарската државна агенција (БТА) јави дека коалицијата предводена од ВМРО-ДПМНЕ понесе победа на шестите парламентарни избори во Македонија.



БТА ја пренесува изјавата на претставникот на ВМРО-ДПМНЕ Илија Димовски дека оценката на владејачката партија за изборите е дека тие се фер и демократски и оти само на два проценти од територијата на државата се регистрирани инциденти.



БТА наведува дека албанската владејачка Демократска партија на Албанците (ДПА) веќе празнува во Тетово. Портпаролот на партијата Адриатик Имери изјавил дека ДПА извојувала убедлива и голема победа над Демократската унија на Албанците и ги покани сите Албанци да празуваат бидејќи тоа е и голем�� победа на сите Албанци.

Српската државна агенција Танјуг јавува за победа на „Коалиција за подобра Македонија“ наведувајќи дека таа ќе има 63 пратеници во 120 пратеничкиот парламент.

Хрватската новинска агенција (ХИНА) исто така ја пренесува изјавата на Груевски за освоеното мнозинство во идниот состав на Собранието. ХИНА соопштува и дека според македонската Државна изборна комисија, според нецелосните првични резултати партијата од десниот центар ВМРО-ДПМНЕ е во голема предност пред опозицискиот СДСМ. (MИA)