ДИК: Инцидентите ќе фрлат сенка врз изборите
Драматичен апел до партиите да престанат со притисоците и заплашувањата
Катица Чангова
„Инцидентите ќе фрлат сенка врз општиот впечаток на вонредните избори за пратеници“, изјави вчера на прес-конференција претседателот на Државната изборна комисија, Јован Јосифовски. Притоа, во име на целата Државна изборна комисија, го изрази огромното жалење и загриженоста од неочекуваниот развој на настаните на денот на изборите.
Вонредните избори може да се оценат како лоши избори, а дали се најлоши ќе може да се коментира по затворање на избирачките места, истакна Јосифовски.
„Изборите во 2006 од домашната и од меѓународната јавност беа оценети како најдобро подготвени и организирани. Кога очекувавме да го докажеме веќе положениот тест на демократијата пред Европа, дека Македонија има капацитет за избори, за жал, изборниот ден почна со голем број нерегуларности“, рече првиот човек на ДИК и самиот загрижен за легитимитетот на изборите.
Јосифовски вчера, шест часа по отворањето на гласачките места, упати драматичен апел до политичките партии да престанат со притисоците и заплашувањата на избирачките органи и да им овозможат на гласачите да го остварат правото на достоинствен начин.
Јосифовски нагласи дека во државата биле евидентирани нерегуларности на дваесетина избирачки места што писмено го документирале општинските изборни комисии на Сарај, Боговиње, Желино, Брвеница, Чучер-Сандево, Арачиново, Гостивар. Јосифовски ја информира јавноста дека членови на ДИК, кои имале намера да го посетат најчувствителниот терен - „шестката“, не биле во можност да го сторат тоа, поради нерегуларностите и неправилностите.
Претседателот на ДИК изрази огромно жалење за повредените лица и посака брзо закрепнување.
За утеха е тоа што во другиот дел од државата има мирна, фер и демократска изборна атмосфера, нагласи Јосифовски. „Бевме во Аеродром и во Гази Баба. Сретнавме насмеани лица кои одеа и се враќаа од избори кои рекоа дека нема никакви проблеми“.
|
