Во Тетовско имаше многу нерегуларности и инциденти
Повеќе екипи на меѓународни набљудувачи ги посетуваа тетовските села
Гојко Ефтоски
Светлана Унковска
ТЕТОВО - Бројни инциденти, тепачки и нерегуларности го одбележаа изборниот ден во Тетово и Тетовско. На голем дел од избирачките места гласањето само навидум се одвиваше мирно и регуларно, но видно беше присуството на групи активисти.
Многубројни беа примерите на групно гласање, се доаѓаше на гласање и без документи, а некаде дури не се употребуваа ни УВ-ламбата и спрејот. На избирачките места имаше мало присуство на партиските набљудувачи на ДУИ, кои, како што тврдат нивните колеги од ДПА, си заминале затоа што не биле заинтересирани да го следат гласањето.
Од ДУИ, пак, ова го негираат и велат дека во голем број од избирачките места нивните набљудувачи со закани биле истерани. Екипи на меѓународни набљудувачи на ОДИХР и на американската амбасада ги посетуваа селата, посебно таму каде што се добиваа информации за нерегуларности, а изборниот процес го следеа медиуми од Косово и албанскиот ТВ Топ ченел.
Во тетовско Боговиње, градоначалникот Невзат Елези и претседателот на Изборниот штаб на ДУИ заработиле и неколку тупаници по лицето. Тој вели дека инцидентите започнале уште во раните утрински часови за време на отворањето на гласачките места.
„Во неколку изборни места во Камењане, Боговиње, Синичане, Горно Седларце, Ново Село 2 и Долно Палчиште имаше многубројни инциденти. Во овие села имаше обиди за полнење кутии од активисти на ДПА, откако претходно предизвикале насилства. Во Камењане, но и во другите населби, точно ги знаеме учесниците во инцидентот, бидејќи повеќето се мештани. Во Раковец имаме информации дека луѓе кои се наоѓаат на работа во странство биле евидентирани дека гласале. Не дај боже, ако ова се сметаат за избори“, вели Елези. Тој и самиот бил жртва на насилствата. Се здобил со повреди откако бил удиран со тупаници по лицето.
Во училиштето во Камењане каде што има четири изборни места настанала тепачка во која било пукано со пиштол. На таванот пред изборачкото место 2255 се забележани дупки од куршуми, а Беким Кадриу, заменик-претседател на Избирачкиот одбор тврдеше дека членот на одборот Шпетим Исени бил претепан од полициски инспектор. Жители на Камењане ни рекоа дека во ходникот најнапред настанала голема мешаница во која освен пцости и викотници насилниците употребиле и пиштол. Целта, наводно, била да влезат и да ги наполнат кутиите. Ова избирачко место гласањето било во прекин повеќе од еден час, додека на 2057 прекинот траел дваесетина минути.
Во Боговиње се затворени неколку избирачки места поради полнење на кутиите, а на избирачкото место 2072 бил украден печатот. „На изборното место околу осум часот намерно се предизвика мешаница во која јас ги заштитив гласачките ливчиња, но некој ми го украде печатот. По десетина минути, полицијата успеа да го пронајде и ни го врати. Гласањето потоа нормално се одвиваше“, вели Садуш Ферати, претседател на Избирачкиот одбор. На изборните места во Долно Палчиште навидум ништо не се случуваше. М��ѓутоа, според Сервет Џемаили, од пет-шест луѓе имало обид да се уфрлат педесетина гласачки ливчиња. Намерата била попречена. Од жители на ова село се дознава дека околу 10 часот од кафеаната „Дула“ полицијата ги привела Џемали Илјази и Изедин Куртиши, кај кого пронашла пиштол.
Во тетовското училиште „Кирил и Методиј“ полицијата уапсила тројца активисти на ДУИ кои во дворот на училиштето дошле вооружени. Поради ова, како што, рече еден од полицајците, гласањето било привремено прекинато, но набрзо потоа продолжило. Во Желино, каде што поради кршење на кутија претходно било прекинато гласањето, ливчињата се ставаа во отворена гласачка кутија, а ова набљудувачот на ДПА го оправда со тоа што во неа имало многу гласачки ливчиња. |
