„Космофон“ ќе мора да се продава
„Космофон“ мора да се продаде, бидејќи тоа е единствен начин да се одбегне концентрацијата на пазарот на мобилна телефонија во Македонија што се создаде откако „Дојче телеком“ го купи грчки ОТЕ, одлучи Комисијата за заштита на конкуренцијата
„На завчерашната седница донесовме решение со кое ја одобривме концентрацијата на пазарот на мобилна телефонија, но под одредени услови, кои се прифатени како предлог на ’Дојче телеком‘ и ’Космофон‘. Основна работа е дека Комисијата го прифати предлогот на учесниците во концентрацијата ’Космофон‘ да биде продаден“, изјави претседателот на Комисијата за заштита на конкуренцијата, Чедомир Кралевски.
Тој потенцира дека рокот за продажбата и сите преостанати информации поврзани со тоа се службена тајна.
Според Кралевски, доколку „Дојче телеком“ не постапи според усогласените услови, тогаш Комисијата има механизми и ќе поведе прекршочна постапка и ќе изрече соодветни казни. Висината на казната може да се движи и до 10 проценти од остварениот промет во претходната година, како и забрана за вршење на дејноста во одреден временски период.
Со купувањето акции во грчки ОТЕ се создаде нарушување на конкуренцијата на македонскиот пазар на мобилната телефонија, бидејќи „Космофон“ е фирма-ќерка на ОТЕ, а „Т-мобиле“ фирма-ќерка на „Дојче телеком“. Двете компании сега поседуваат повеќе од 40 проценти на пазарот на мобилна телефонија, што е спротивно со Законот за заштита на конкуренцијата. Иако купопродажбата на ОТЕ од страна на „Дојче телеком“ веќе е завршена, концентрацијата преку „Космофон“ и „Т-мобиле“ на пазарот на мобилна телефонија се' уште не е спроведена во надлежните органи, како што се Централниот регистар и другите државни органи. „Космофон“ и „Т-мобиле“ се' уште егзистираат како посебни субјекти на пазарот, каде што трет субјект од септември минатата година е мобилниот оператор ВИП. (А.С.) |
