Разрешувањето на одборите во Велес незаконско

ВЕЛЕС - Постапката за разрешување на членовите на училишните одбори во основните училишта во Велес што ја изгласа владејачкото мнозинство во Советот на Општина Велес предводено од ВМРО-ДПМНЕ е незаконита. Потврда на ова стаса лично од министерот за образование и наука, Перо Стојановски. Тој во дописот до локалните власти на Велес, кој следува како одговор на барањето на Општината за толкување на законот, објаснува дека мандатот на членовите во училишните одбори во основните училишта трае до истекот на нивниот мандат, односно четири години.

Според градоначалникот на Општина Велес, Аце Коцевски, на ниту еден член од училишните одбори не му е истечен мандатот. Токму поради тоа стручната служба на Општината веќе подготвува иницијативата пред Уставниот суд за преиспитување на уставноста на актите што ги донесе велешкиот Совет.

Во меѓувреме, Советот двапати гласаше позитивно за разрешување на членовите на училишните одбори. Образложение за смените беше дека досега тие биле место каде што биле вгнездени кадри на СДСМ и на ЛДП, а дека сега се поставуваат нови и квалитетни луѓе. (С.Ќ.Н.)