Поглед

За нов живот

Сања Наумовска

Преквалификацијата е можност да се започне нов живот. Нова професија или занает значи нов почеток, кој дава надеж за позитивни промени во секојдневјето. Вака веројатно размислуваат многу млади, често и високообразовани луѓе, кои секојдневно се запишуваат на курсеви за промена на професијата. Географи, историчари, уметници, социолози, но и правници или филозофи стануваат фризери, козметичари, масери, келнери, водоводџии. За подобро утре се одлучуваат да учат и за плочкари, електричари, ѕидари или молери. Колку помалку време поминуваат во разочарување и барање на одговорот, зошто сето тоа им се случува токму ним и колку помалку жалат за времето и трудот вложени во своето образование, толку подобро и полесно за нив.

Во борбата за живот се напуштаат соништата од младоста со кои се избирале факултети. Сега, соочени со реалноста и најчесто со потребите на пазарот на трудот младите стануваат практични. Годините поминати во учење, факултетските дипломи и знаењето понекогаш не значат ништо ако не можете да добиете работа. Невработеноста може да трае и со години, па храбри чекори како преквалификација се неопходни.

Притиснати од желбата да се реализираат, да основаат семејства и да живеат нормален живот младите престануваат да бираат, туку оставаат пазарот на труд да ги избира нив. Иако сега универзитети се отвораат на секој чекор и се поставува прашањето со каков квалитет е образованието што го нудат, сепак, практиката вели дека факултетлиите им се враќаат на занаетите. Со нив многу полесно, побрзо се наоѓа работа, а и добро се заработува. Занаетите нудат можност за самовработување, па, всушност, никој од никого не зависи и не мора да бара помош.