Тивкиот претседател и мудроста - молчењето е злато!

Последното истражување на ИПИС покажа дека Иванов позитивно го доживуваат околу 50 проценти од граѓаните

Оливера Војновска


Претседателот Ѓорге Иванов, кој во изминатиот турбулентен период низ кој минува државата како да изгради култ од молчењето, оставил позитивен впечаток кај речиси половина од македонските граѓани. Така барем покажа последното истражување на јавното мислење на Институтот за политички истражувања (ИПИС), според кое, Иванов како и премиерот Никола Груевски, позитивно ги перцепираат 47 проценти од анкетираните. Сондажата уште покажа дека тивкиот претседател е личноста за која најмал процент од испитаниците искажале негативно мислење - 42, 3 отсто. За сите други што биле посочени во анкетата негативните емоции на граѓаните биле поголеми. Вклучително и Груевски, за кого негативно мислење имале 46,4 отсто од испитаниците.

Иванов ја тера втората година од мандатот и, можеби, поучен од народната мудрост - молчењето злато вреди, досега ниту еднаш не излезе со сопствен став. Туку во сите јавни настапи и во интервјуата што ги даваше ги повторува ставовите на премиерот и на Владата. Во последното годишно обраќање во парламентот самиот кажа дека е свесен за таквите критики во јавноста, но најави дека и во иднина нема да се конфронтира и да ја нарушува кохезијата со Владата.

Поранешниот амбасадор во Брисел и претседателски кандидат, професорот Нано Ружин, вели дека во ситуација кога е спуштено нивото на комуникација, кога сме сведоци на еден исклучително приземен политички дијалог меѓу власта и опозицијата, Иванов е прилично тивок и со својата пасивност не ја иритира јавноста. „Од една страна, имаме груб, жесток речник меѓу власта и опозицијата, а на другата страна, е еден мирен молчелив претседател.

Нашиот народ не трпи острина, а Иванов остава слика на повлечен човек што не влегува во расправии“, вели Ружин. Според него, Иванов не успева да го привлече вниманието со начинот на кој ја извршува функцијата. „Од истражувањето не може да се извлече заклучок дека граѓаните ја поддржуваат политиката на Иванов, бидејќи тој послушно ја спроведува политиката на Груевски. Претседателот не се ни обидува да се наметне со сопствени ставови. Тој е незабележителен претседател и остава впечаток како да ужива во функцијата. Протоколарно се појавува онаму каде што треба и со реторика од типот ’ додека сум жив не го давам името’, ги задоволува страстите на тврдото национално ткиво“, вели Ружин.

Во анкетата на ИПИС ставовите на Иванов за спорот со името со Грција ги поддржуваат 53,4 отсто од анкетираните, 39,6 не согласуваат со шефот на државата, а 6,9 проценти не одговориле. Според истражувањето, граѓаните најдобро ја оцениле работата на претседателот на државата со 2,83 (на скала од 1 до 5), Владата е оценета со 2,81, а Собранието со 2,42.

Наспроти мислењето на Ружин, политикологот Владимир Божиновски од ИПИС смета дека Иванов успеал да се наметне во јавноста. „Резултатите од анкетата покажуваат дека Иванов станува препознатлива политичка личност. Тој е избран од симпатизерите на ВМРО-ДПМНЕ, но успева да се издигне од дневната политика и јавноста го доживува како претседател на сите граѓани“, смета Божиновски.

Инаку, сите досегашни анкети со кои се мери популарноста на политичарите, покажаа дека рејтингот на Иванов е малку над нулата, односно дека граѓаните не се идентификуваат со претседателот. Кога анкетарите ќе тропнат на врата или ќе заѕвонат на телефон за да прашаат во кој политичар граѓаните имаат најголема доверба, малкумина го посочуваат Иванов.