Изнудени оставки на Митриновски и Лимани?

Судскиот совет веќе в четврток ќе ги констатира оставките на двајцата судии што одлучуваа за тутунскиот бос Бајруш Сејдиу

Гордана Дувњак


Двајцата апелациони судии за кои Врховен суд побара одговорност поради нивното одлучување за тутунскиот бос Бајруш Сејдиу си дадоа оставка. Како што дознаваме од сигурни, но неофицијални судски извори, првиот човек на скопскиот Апелационен суд, Јордан Митриновски, се повлекува од претседателската функција, но останува судија, а неговиот колега кривичар, Исмаил Лимани, си заминува од судството. Како официјална причина за двете повлекувања е наведена вообичаената формулација „здравствени проблеми“.

Претседателот на скопска Апелација, Митриновски, вчера ниту ја потврди ниту ја демантираше оваа вест, нервозно одговарајќи дека во овој момент „не сака да коментира ниту, пак, да дава никакви изјави“.

Според информациите на „Утрински весник“, двајцата апелациони судии оставките ги доставиле до Судскиот совет уште минатиот четврток, на крајот на работното време. Во нив немало никакво објаснување за мотивите, освен дека тоа го прават од здравствени причини.

Веќе в четврток нивните оставки ќе бидат ставени на дневен ред на седница на Судскиот совет, каде што ќе нема гласање, туку само ќе бидат констатирани. Најверојатно, уште истиот ден ќе биде назначен и вршител на должност претседател во скопска Апелација. Многу е веројатно на истата седница да бидат донесени одлуки за објавување два нови огласа: за претседател на судот, како и за пополнување на двете испразнети судиски места. Едното што остана непополнето со последниот оглас, а второто, по оставката на Лимани.

Во судските кругови, во кои вчера проструи веста за повлекување на двајцата апелациони судии, ова се толкува како последен удар на власта за ставање под целосна контрола на второстепениот суд. Хајката против скопска Апелација почна уште многу одамна, а се засили по укинувањето на неколку крупни пресуди за корупциски скандали како што беа „Тајвански кредити“, „Змиско око“, „Југ“ 1 и 2... Кулминацијата беше достигната со ставањето надвор од функција на цел Кривичен совет од овој суд и разрешувањето на двајца од петтемина судии што одлучуваа за турскиот државјанин со двојно државјанство. По иницијатива на министерот за правда, Михајло Маневски, прво беше побарано разрешување на претседателот на едниот од кривичните совети, Виолета Дума, кон која, како што се тврдеше, тој и неговата сопруга Филимена имаат силен личен анимозитет. Но, по барање на претседателот на Судскиот совет, Васил Грчев, одговорноста беше проширена на сите петмина члена на советот, за на крај „стапот да го изедат“ спомнатата судијка и судијата-известител, Владо Џилвиџиев. Тогаш, од разрешување се спаси судијата Исмаил Лимани, но тој беше повторно прозван на одговорност за друга своја одлука. Имено, тој заедно со Митриновски, како член на тричлениот Кривичен совет, гласаше позитивно за замена на притворот со куќен притвор засилен со гаранција во вредност од 1,4 милиони евра. Но, по иницијатива на Јавното обвинителство на Македонија Врховен суд го усвои барањето за заштита на законитоста и го укина неговото решение како неосновано.

Цело ова време Лимани не се појави во јавноста, иако Митриновски тврдеше дека неговиот став го дели и посочениот судија. Според наши информации, Лимани порано работел како судија во Основниот суд во Куманово, а во второстепениот суд е избран со генералниот реизбор во 1996 година. Порано работел на стопански спорови, а од 2006 година во кривично. Индикативно е тоа што одлуката за заминување од судството ја носи само една година пред пензија. (Г.Д.)