Кумановските касарни индустриска зона
КУМАНОВО - Комплексот касарни „Христијан Карпош“ на бившата ЈНА во Куманово, сепак, ќе бидат пренаменети за индустриска зона, најавуваат од Министерството за одбрана.
„Созреани се условите поголем дел од касарните и караулите во државава да се пренаменат за потребите на бизнисот и на стопанството. Решението на Министерството за одбрана да ги стави во функција овие објекти ќе биде шанса за развој на стопански дејности и за намалување на невработеноста“, изјави министерот за одбрана, Зоран Коњановски, по средбата со кумановскиот градоначалник.
Коњановски додаде дека во наредните месеци општините на чии подрачја има вакви објекти треба да ги вклопат во деталните урбанистички планови и да направат соодветни програми за стопански активности.
Градоначалникот на Куманово, Зоран Дамјановски, потсети дека во 2006 година Министерството за одбрана и' го додели комплексот на Општината, а решението беше поништено од актуелната Влада. Одлуката на Владата беше обжалена на суд, а тужбата ќе биде повлечена, најави Дамјановски. (Ст.Б.)
|
