Од идната година нема пушење во ЕУ

Се подготвува забрана за пушењето на јавни места во целата Унија

БРИСЕЛ - Европската комисија се подготвува да воведе закон во 2011 година за забрана за пушењето на јавни места во целата Унија. Иако делумни или целосни забрани за пушење се воведени во многу европски земји со кои се става крај на можноста да се пуши во барови, кафулиња и други јавни места, сепак е релативно лесно во некои држави да се најде засолниште каде што пушачите се добредојдени или поради исклучоци на тие закони или бидејќи сопствениците не ги почитуваат забраните.

Комесарот за здравство Џон Дели изјави дека сака да стави крај на тоа. "Потребна ни е целосна забрана за пушењето на сите јавни места, во сообраќајот и на работните места", изјави тој во интервјуто за германскиот дневен весник "Ди велт". Најавувајќи дека Брисел подготвува нацрт закон што ќе биде донесен идната година, тој изјави дека исклучоците не треба повеќе да се толерираат бидејќи ова прашање "не е само за здравјето на посетителите, туку исто така и за вработените".

На пример во Белгија каде што се наоѓа седиштето на извршното тело на ЕУ, каде се уште можат да се палат цигари во кафулиња се додека не се служи храна, додека грчкиот министер за здравство минатата недела го призна ефективниот неуспех на забраната за пушење од 2009 година, истакнувајќи дека тајните инспекции откриле дека во осум од 10 барови отворено се прекршува законот.

Нацрт законот на ЕУ може исто така да биде обид да се намали количеството на никотин и други токсични супстанции кои се наоѓаат во производот. Комисијата и понатаму ќе се обидува да добие согласност за правилата со кои тутунските производи нема да бидат видливи за купувачите и пакувањата ќе бидат колку што може неатрактивни. Пакувањата треба да бидат направени идентично во изгледот и на нив да има предупредувачки слики во живи бои како што се заболени бели дробови како и повеќе информации за токсините што се наоѓаат во производот. "Колку е поуниформно и неинтересно пакувањето на цигарите толку подобро", изјави комесарот.

Зависноста од пушење секоја година убива околу 650.000 Европејци. (ЕУ обзервер)