Новинари во апс поради интервју

Двајца германски новинари разговарале со синот на жената осудена на смрт со каменување

Иранскиот јавен обвинител Голам Хусеин Мохсени Еџеје потврди дека двајцата странци, кои влегле во земјата како туристи, се во притвор откако се обиделе да му постават неколку прашања на синот на Сакинех Мохамади Аштијани. Случајот на Аштијани предизвика бурни меѓународни реакции откако 43-годишната мајка на две деца беше осудена на смрт со каменување поради прељуба и убиство на својот сопруг.

„Истрагата покажа дека двајцата странци не се новинари и тие се уапсени поради фалсификување на новинарскиот статус“, изјави Еџеје. Иако обвинителот одби да го соопшти нивниот идентитет, тој укажа дека станува збор за Германци со тоа што ги поврза со иранскиот борец за човекови права со седиште во Келн, Мина Ахади.

Портпаролот на германското Министерство за надворешни работи изјави дека амбасадата на оваа земја во Иран се об��дува да ги потврди информациите дека станува збор за германски новинари. Здружението на германски новинари на својата Интернет-страница повика на итно ослободување на новинарите. Претседателот на здружението, Михаел Конкен, оцени дека обвинувањата оти двајцата не биле акредитирани е само изговор за забраната да се информира за нарушувањето на човековите права во Иран.

Активистката Мина Ахади од својата канцеларија во Келн телефонски им преведувала на новинарите за време на интервјуто. Таа потврди дека станува збор за двајца новинари на германскиот весник „Билд ам зонтаг“, но одби да ги идентификува поради безбедносни причини.

И покрај притисокот од меѓународната заедница, иранските власти опстојуваат во намерата да ја извршат смртната казна врз Аштијани. Вчера околу 50 Иранци, кои живеат во егзил во Норвешка, протестираа во Осло за поддршка на осудената Аштијани. (Дојче веле)