| Без Стојановиќ против Исланд и Белгија
Од СП ќе го нема ни повредениот Димовски, Јоноски се враќа по две години
Иако по враќањето од Светското ракометно првенство во Хрватска ни изјави дека не го отпишал и покрај конфликтот со него поради кој го врати во Македонија по првиот круг, селекторот Иле Темелковски, сепак, не го повика Радослав Стојановиќ за претстојните дуели со Исланд и со Белгија во квалификациите за Европското првенство 2010 во Австрија. Од составот што настапи на мундијалот ќе го нема ни Ванчо Димовски, кој ќе оди на операција на коленото во Австрија. Ацо Јоноски, пак, по две години се враќа во репрезентацијата.
За продолжението од евроквалификациите Темелковски повика 19 ракометари, и тоа голманите Ристовски, Ангелов и Митревски, крилата Алушовски, Макалоски, Недановски, Темелков и Златко Мојсоски, бековите Кирил и Филип Лазарови, Наумче Мојсоски, Миркуловски, Митков, Јоноски и Мите Стоилов, како и пикерите Ѓоргоноски и Стојанче Стоилов.
Македонија на 18 март во Скопје го пречекува Исланд, а четири дена подоцна и' гостува на Белгија во Херстал. Лидер во третата група е Норвешка со седум бода од четири средби, Исланд и Македонија имаат по три од два меча, колку и Естонија од четири натпревари, а последни се Белгијците без бодови од четирите одиграни дуели.
Загреб на Лазаров против Кил
Најдобриот македонски ракометар Кирил Лазаров и неговиот Кроација осигурање Загреб во четврт-финалето на Лигата на шампионите за противник го добија ланскиот финалист Кил. Хрватскиот првак е домаќин на првиот меч што треба да се одигра меѓу 25 и 29 март, а реваншот ќе биде меѓу 1 и 5 април во Германија.
Другите двојки за четврт-финалето се: Сиудад Реал (Шпанија) - Веспрем (Унгарија), Флензбург (Германија) - Хамбург (Германија) и Чеховски медведи (Русија) - Рајн Некар (Германија).
ЛШ в година со 24 екипи
Лигата на шампионите во машка конкуренција од наредната сезона ќе има помалку учесници, се договорија клубовите на понеделничкиот состанок во седиштето на Европската ракометна федерација во Виена. Бројот на екипите од 32 ќе се намали на 24, а полуфиналето и финалето ќе се одиграат на едно неутрално место, како во Суперкупот.
Конечната одлука за промената на натпреварувачкиот формат ќе биде донесена на седницата на ЕХФ кон крајот на март во Москва.
Бревик замина во пензиЈа
Легендарната селекторка на женската ракометна репрезентација на Норвешка, 53-годишната Марит Бревик, се повлече од кормилото на националниот тим. Минатиов викенд таа последен пат ја водеше најуспешната женска селекција во светот во двата пријателски натпревара со Франција на гостински терен. Французинките направија сензација во првиот, победувајќи со 23:21, а Норвежанките се реваншираа во вториот, славејќи со 22:17.
Во 15-те години на чело на норвешкиот тим Бревик освои 13 медали од големите натпреварувања од рангот на ОИ, СП и ЕП, а последно и' беше златото на Европското првенство што во декември минатата година се одржа во Македонија. (Р.Д.) |
