Жени-мировници против силување во војните

ОБЕДИНЕТИ НАЦИИ - Американската државна секретарка Хилари Клинтон во средата ја пофали улогата на Индијките, припаднички на мировните сили, во спречувањето на насилствата против жените и девојчињата во Либерија, наведувајќи дека тие претставуваат пример на кој треба да се угледаат мировните мисии низ светот. „Индиската единица помогна да се мотивираат поголем број Либеријки да учествуваат во кампањата против силувањето, почната со заеднички сили на ОН и либериските власти“, изјави таа, додавајќи дека жените-мировници претставуваат „пример што мора да биде повторен во мировните мисии на ОН низ цел свет“.

Државната секретарка побара од земјите-членки да ги вклучат жените во дизајнирањето и во имплементирањето на националните и на меѓународните програми за градба на мирот. „Мора да се обидеме да обезбедиме услови нашите воени и полициски сили, особено оние што ќе учествуваат во мировните мисии, да се здобијат со стручност да спречат и да одговорат на насилството против жените и децата“, изјави Клинтон.

За време на 15-годишната граѓанска војна во Либерија, во земјата се случија голем број силувања и други форми на сексуално насилство. (Тајмс оф Индија)