Кадиевиќ доби руско државјанство
Хрватската потерница по поранешниот југословенски генерал Вељко Кадиевиќ сега нема значење
МОСКВА - Пензионираниот југословенски генерал Вељко Кадиевиќ (83) од 13 август 2008 година е граѓанин на Руската Федерација. Руската федерална служба за миграции го прифати неговото барање за добивање државјанство, а претседателот Дмитриј Медведев го потпиша указот во кој меѓу 14-те лица се наоѓа и Вељко Кадиевиќ. Таа вест ја потврди и Кадиевиќ за московскиот неделник „Бољшој город“, кој со остарениот генерал разговараше во најновиот број. Во тој текст каде што се опишува кои се тие 14 лица кои добиле руско државјанство, Кадиевиќ објасни и зошто побарал од Русија да му се овозможи нормално да живее кај нив.
Рускиот Устав не дозволува граѓаните на оваа земја да бидат испорачани на друга земја, па хрватската потерница за Вељко Кадиевиќ од моментот кога доби државјанство, значи од 13 август годинава, сега нема значење. Кадиевиќ во 2005 година доби статус на бегалец. Според рускиот закон, требаше да поминат три години па да побара и државјанство и да добие руски пасош. Таков бегалски статус имаат и Мира и Марко Милошевиќ, со кој, патем речено, тој не контактира. Секој од нив засебе со право мисли дека своевремено бил важна личност, па и одвоено пишува свои мемоари, а кои ќе бидат најдобри и најинтересни ќе покаже времето.
Генералот Кадиевиќ беше последниот министер за одбрана во социјалистичка Југославија во периодот од 1988 до 1992 година. Тој беше на чело на армијата во 1991 година, кога беа водени воените операции во Вуковар и во Дубровник поради кои против него во Хрватска беше поднесен обвинителен акт. По објавувањето на биографската книга на Кадиевиќ „Контраудар“ во Москва и неговите интервјуа, во кои објаснуваше дека постојано престојува во тој град, Хрватска побара од Русија негово испорачување за да му се суди во Хрватска. Властите во Русија не го прифатија барањето што стигна од Загреб, бидејќи сметаат дека нема доволно аргументи за испорачување. |
