Грција е во изборна треска, каква реална тежина имаат заканите од Атина

Од нашиот дописник
Слободанка Јовановска



Брисел - Одлуката на грчкиот премиер Константин Караманлис да свика вонредни парламентарни избори додека Европската комисија се подготвува да предложи датум за преговори со Македонија ја исфрла во прв план дилемата - кој ќе ни стави вето и каква реална тежина имаат сега заканите во Брисел на актуелната грчка влада?

Бидејќи целата ситуација е хипотетичка, одговорот може да се побара само во агендата на Унијата, односно најавите кога таквиот предлог на ЕК би се нашол пред расправа и во процената има ли време Атина политички да се консолидира.

Еврокомесарот Оли Рен завчера потврди дека следниот извештај на ЕК за прогресот на Македонија ќе биде објавен за шест недели, што значи дека во средината на октомври, ако се' уште има расположение за тоа, Македонија може да добие предлог за започнување преговори. Предлогот вообичаено треба да го помине филтерот на министрите за надворешни работи, а првиот можен состанок за тоа е на 26 октомври, па и одлуката може да финишира по брза постапка на вонредниот самит закажан за 29 октомври. Ако сака ЕК да ја фати Грција на „спиење“ или ако сака Атина да си најде излез од ветото, таквото сценарио би било најповолно, бидејќи има големи изгледи новата грчка влада да не се формира толку брзо и лесно.

Второто сценарио е евентуалниот предлог за преговори со Македонија да стигне на ноемврискиот или декемврискиот состанок на министрите за надворешни работи, а одлуката да се носи на самитот на ЕУ на 10 или 11 декември, што во моментов е многу поверојатно. Дотогаш Грција сигурно ќе добие нова влада, а ако тоа е ПАСОК, ќе ја има неблагодарната задача да ја исполни заканата на Нова демократија, освен ако не се реши за нова политика спрема Македонија или дотогаш не го реши спорот со нашата држава. Ако на власт и натаму е Нова демократија, очекувањата се дека нејзината позиција во парламентот ќе биде уште послаба отколку досега, во смисла дека ќе мора да прави коалиција со екстремната партија Лаос, така што ветото во таква ситуација не ни бега, но со сериозни последици не само за нас, туку и за таквата грчка влада.

Иако тоа никој не го кажува јавно, сепак, станува јасно дека Брисел има се' помалку трпение и разбирање за политиката на Караманлис кон Македонија и дека решение на спорот и поголема флексибилност од нивна страна бараат не само од ЕУ, туку и од НАТО.

Неодамна генералниот секретар на НАТО, Расмусен, дипломатски, но доволно остро и' ставил до знаење на Атина дека очекува попустливост околу спорот, а и од ЕУ и од Алијансата се' почесто се слуша реченицата дека билатералните проблеми веќе не се билатерални и дека стануваат европски проблем. Тоа го кажа еврокомесарот Оли Рен завчера во ЕП, а истиот ден и Расмусен на прес-конференцијата во НАТО повтори дека не сака билатералните спорови да се одразуваат на работата на Алијансата. Самоувереноста со која еврокомесарот Оли Рен навестува можни преговори со Македонија, сепак, не може да биде случајна, а што стои зад неа е прашање кое ги збунува сите во Брисел кои на некаков начин се инволвирани во процесите околу Западен Балкан.