Изборите во Грција ја релаксираа Владата во Скопје

Решавањето на спорот за името се одложува на неодредено време

Соња Крамарска

Предвремените парламентарни избори во Грција вчера не ја вознемирија македонската Влада, туку, напротив, како да го релаксираа амбиентот во Кабинетот на премиерот Никола Груевски.

Тој спокојно разговараше со членовите на кошаркарската репрезентација пред нивното заминување на Европско првенство во Полска, а во парламентот, пак, пратениците на владејачката партија беа зафатени со давање изјави за лустрацијата.

Накратко кажано, мирен политички ден во Скопје додека 700 километри појужно во Атина се случуваат вистински политички турбуленции. Премиерот Костас Караманлис, по прексиноќешното обраќање до јавноста, речиси истовремено кога држеше митинг неговиот главен политички ривал Јоргос Папандреу, вчера се упати кон претседателот Каролос Папуљас од кого побара да го распушти парламентот и да распише предвремени избори. Најверојатниот датум за изборите е 4 октомври.

Што ќе значи тоа за преговорите за името и воопшто за македонските интеграции кои се блокирани од страна на јужниот сосед поради одбивањето на нашата земја да го смени уставното име Република Македонија?

Тоа е прашање што, по се' изгледа, никого не го вознемирува и не само тоа, туку вестите што доаѓаа вчера и завчера од грчката престолнина и' обезбедија силно политичко алиби на македонската Влада за развлекување на преговарачкиот процес.

Владата е во очекување да добие датум за почнување преговори за членство на Македонија во ЕУ и сите надежи се свртени кон претходно добивање позитивен извештај за степенот на напредокот на земјата во изминатата година. Вториот момент е укинувањето на визниот режим што премиерот и Владата сметаат дека ќе придонесе за подобрување на расположението кај граѓаните.

Оттука и привидната незаинтересираност за случувањата во Атина. Портпаролот на македонската Влада, Мартин Мартиновски, вчера во телефонски разговор кусо ни рече дека „нема насоки да зборува за што било во врска со предвремените избори во Грција“. Очигледно е дека тие не се тема за анализа на Владата во Скопје.

Независни аналитичари, пак, изразуваат загриженост дека изборите во Грција можат да доведат до застој во преговорите и до одложување на можното решение на спорот. Стево Пендаровски, доцент на Американ колеџот во Скопје, вели дека меѓу Македонија и Грција постои џентлменски договор за време на изборна кампања во која било од двете држави преговорите да мируваат.

„Доколку победат опозициските с��цијалисти, кои сега имаат предност во анкетите, тогаш мирувањето на преговорите може да потрае подолго, бидејќи ќе им треба време за приспособување со оглед на тоа дека се во опозиција од 2004 година“, вели Стево Пендаровски.

Партијата на грчкиот премиер Костас Караманлис, Нова демократија, победи два пати на избори и тоа во март 2004 година и во септември 2007 година. При преминот од еден во друг мандат во 2007 година, бидејќи се работеше за иста партија на власт, речиси и немаше празен простор, што е вообичаен за приспособување на нова влада. Меѓутоа, сега, предноста на опозициските социјалисти од 6 проценти во анкетите и антивладиното расположение се индикатор дека кај нашиот јужен сосед наскоро би можело да дојде до смена на власта.

Иако македонската Влада не прави анализи на развојот на политичката ситуација во Грција, тамошните настани можат да доведат и до поголем застој во преговорите, бидејќи во март следната година завршува мандатот на претседателот Каролос Папуљас. Евентуалниот неуспех да се избере претседател на Грција во март според нивниот устав ќе доведе до ново распуштање на парламентот и нови вонредни избори.

Состанокот на министрите за надворешни работи на земјите-членки на ЕУ во некој од следните месеци до крајот на годинава треба да даде одговор на прашањето дали Македонија ако добие позитивен извештај од Европската комисија, ќе добие и датум за преговори, и најсуштинското прашање - дали новата влада на Грција ќе има време да организира второ вето кон нашата земја. (С.К.)