Поглед
Шкотите во Скопје
 Наум Котевски
Една слика вреди илјада збора - е старата кинеска мудрост што го антиципира жалниот портрет на шкотските навивачи кои со своите гајди останаа, немајќи доволно воздух од шокот, да си потсвирнуваат фалш пред „Софка“, наместо да ја свират својата традиционална музика на трибините од Градскиот стадион, за што минаа илјадници километри.
Како убиствена последна четка на таа лоша слика, очекувано дојдоа и зборовите пласирани од медиумите на Островот со кои беше пратена неубава порака низ светот дека „Скопје не им кажа добредојде на добронамерните Шкоти“.
На сето ова ФФМ одговори дека работела според правилата на ФИФА и во таа насока биле обезбедени 1.000 влезници за гостинските навивачи за источната трибина, кои навремено биле доставени до Шкотската федерација.
Тоа се факти кон кои се држат ФФМ и полицијата, но на сите им е јасно дека овие две институции сестрински терцираа, пеејќи некаков антифон, на звуците на синтисајзерот на германскиот бизнисмен Дирк Виезнан, посредникот во аферата со препродажба на влезници за Јужната трибина за шкотските навивачи.
ФФМ сакаше да остане со чист образ, тоа и го направи, но дефинитивно ќе беше во таква состојба и ако ја фатеше попрагматичната насока. Можеше брзо да се одговори на искрените молби на Шкотите со пренасочување на нивните навивачи на Источната трибина, која не беше исполнета до крај, или со креирање посебен обезбеден пункт на Јужната, со цел сето ова да не се претвори во кошмарен крај на едно македонско-шкотско величествено дружење. Шкотите за неколку дена со својата веселост во Скопје оставија околу 1,3 милиони евра и заслужија да се најдат на трибините. Ако некој претходно ги излажал, тоа не значи дека не можеше да се најде решение. |
