Шпанија прв финалист на Дејвис купот
Надал го декласира Родик за недостижно водство од 3:1 во Мадрид
Шпанските тенисери го симнаа од тронот бранителот на титулата САД, промовирајќи се во први финалисти на Дејвис купот, откако Рафаел Надал славеше против Енди Родик за недостижно водство од 3:1 во натпреварот на земјените терени во Лас Вентас кај Мадрид. На светскиот рекет број еден му беа потребни 2,12 часа за да ја заврши работата со најдобриот американски тенисер, победувајќи го со 6-4, 6-0, 6-4.
Како и пред четири години во Севилја против истиот противник, Шпанците, кои и тогаш славеа и ја ставија во своите витрини втората „салатара“, по првиот натпреварувачки ден поведоа со 2:0. Надал го загуби првиот сет од Сем Квери со 7-6 (5), но ги доби преостанатите три со 6-4, 6-3, 6-4, а потоа Давид Ферер беше поуспешен во маратонот со Родик, кој му припадна со 7-6 (5), 6-4, 2-6, 1-6, 6-4, 8-6. Американците намалија во двојки преку Марди Фиш и Мајк Брајан, кои беа подобри од Фелисијано Лопез и од Фернандо Вердаско со 4-6, 6-4, 6-3, 4-6, 6-4. За најдобриот светски тенисер во двојки Брајан тоа беше прв меч по шест години во кој партнер не му беше повредениот брат-близнак Боб.
Пред синоќешното продолжение на другото полуфинале во Буенос Аирес, домаќинот Аргентина водеше со 2:1 против Русија. Давид Налбандијан го совлада Игор Андреев со 7-6 (5), 6-2, 6-4, Хуан Мартин дел Потро го „прегази“ Николај Давиденко со 6-1, 6-4, 6-2, а Русите намалија преку Игор Куницин и Дмитри Турсунов, кои беа поиздржливи во дубл маратонот со Гилјермо Кањас и со Налбандијан, добивајќи го со 6-2, 6-1, 6-7 (9), 3-6, 8-6.
Во Светската група се врати Швајцарија, која предводена од Роже Федерер и' нанесе висок пораз од 4:1 на Белгија. Повратник е и освојувачот на Дејвис купот од пред две години, Хрватска, која имаше недостижни 3:1 против Бразил во Задар. Во 2009 во најелитниот ранг ќе играат и Израел, кој во Рамат Хашарон водеше со 3:1 против Перу, потоа Србија, која имаше водство од 4:0 против Словачка во Братислава, како и Романија, која со 3:1 водеше против Индија во Букурешт. (Р.Д.) |
