Македонија, конечно, на Евробаскет
Кошаркарите славеа над Естонија со 87:75 и по десет години повторно ќе играатна Европско првенство
Роберт Димитриевски
По ракометарите (СП во Хрватска), ватерполистите (СП во Рим), шахистите (ЕП во Нови Сад) и тенисерите (Дејвис куп), на големите екипни натпреварувања в година ќе учествуваат и македонските кошаркари. Со победата над Естонија од 87:75 во Скопје во рамките на последното коло, Македонија го освои првото место во квалификациската група Б и се избори за учество на 36. Европско првенство што ќе се одржи во Полска од 7 до 20 септември 2009 година.
За да завршат на врвот во групата, на избраниците на селекторот Јовица Арсиќ на рака им одеше и поразот на директниот конкурент Летонија од 93:92 на гостувањето во Португалија, кој, пак, на Естонците им го направи беспредметен дуелот во Скопје, бидејќи ни со победа немаше да го избегнат разигрувањето за опстанок во А-дивизијата. Тоа значително ни ја олесни задачата, бидејќи на гостите им требаше цело полувреме за да почнат да даваат отпор, но факт е и тоа дека за нивната очајна игра во првите 20 минути, во кои дадоа само 27 коша наспроти 51 на противникот, заслуги имаат и домашните кошаркари. Разликата во класи беше евидентна и кулминира со тројката на Гечевски за водство од максимални 29 поени во овој меч (58:29) по 2,21 мин. во третата четвртина. До крајот на средбата настапи олабавување во македонските редови, кое Естонија го искористи за да ја намали негативата на само десет поени (60:70 на 8,17 мин. до крајот), но не и да направи целосен пресврт.
Интересно, Македонија и во овој меч беше натскокана (26:30), постигна помалку тројки (9:14) и додавања (18:21), но беше неспоредливо подобра за два поена (63 проценти наспроти 48), а имаше и повеќе украдени топки (12:6) и блокади (6:1). Покрај тоа, Естонците загубија 19 топки, а ние 10.
„Победата и пласманот на ЕП се голем успех за нас. Одигравме одлично прво полувреме, кое беше решавачко“, изјави капитенот Врбица Стефанов, а селекторот Јовица Арсиќ додаде: „Многу сум задоволен од победата, која не' искачи на првото место во групата. Естонија е солиден тим и заслужува честитки. Одењето во полска како победник на група е голем плус за нас“.
„Добар меч. Македонија доминираше во првото полувреме, а ние се вративме и одигравме добар втор дел. Имам млад тим, кој се обиде да го даде најдоброто од себе. Освен тоа, ни недостигаше бекот Сок, кој се повреди“, беа зборовите на естонскиот селектор Улар Керде. Бекот Валмо Криса изјави: „Македонија ’лудо‘ го почна натпреварот, а ние одигравме лошо во одбраната и тоа беше клучот на нашиот пораз“.
Ова ќе биде второ ЕП за црвено-жолтите по Франција 1999, каде што по поразите од домаќинот со 71:67, од поранешна СР Југославија со 83:68 и од Израел со 64:62 беше освоено 13. место. Од тимот што тогаш ги бранеше боите на Македониј�� во сегашниот состав се 34-годишниот Врбица Стефанов, потоа Владо Илиевски (28), Тодор Гечевски (31) и Перо Блажевски, кој на 28 септември ќе наполни 36 години.
Македонија - Естонија 87:75
По четвртини: 32:14, 19:13, 17:27, 19:21. Сала: „Борис Трајковски“ во Скопје. Гледачи: 6.000. Судии: Мастрафцис (Грција), Механџиев (Бугарија) и Шутуловиќ (Црна Гора).
Македонија: В. Стефанов 11, Илиевски 9, Мираковски 5, Р. Стефанов 10, Стојановски, Блажевски 3, Тасовски 1, Гечевски 18, Антиќ 16, Гоцевски, Мејси 10, Самарџиски 4. Селектор: Јовица Арсиќ.
Естонија: Теин 5, Дорбек, Криса 12, Талтс 11, Арбет 3, Доронин 5, Рис, Кангур 19, Вески 9, Куламае 11, Маке. Селектор: Улар Керде.
Квалификации за ЕП во Полска
Група А: Финска - Унгарија 88:73, Бугарија - Србија 77:87. Конечна табела: Србија 15 (7/1), Бугарија 12 (4/4), Италија 12 (4/4), Финска 11 (3/5), Унгарија 10 (2/6).
Група Б: Португалија - Летонија 93:92, Македонија - Естонија 87:75. Конечна табела: Македонија 10 (4/2), Естонија 10 (4/2), Португалија 9 (3/3), Естонија 7 (1/5).
Група Ц: Украина - Белгија 58:76, Франција - Турција 78:80. Конечна табела: Турција 12 (6/0), Франција 9 (3/3), Белгија 8 (2/4), Украина 7 (1/5).
Група Д: Босна и Херцеговина - Велика Британија 89:80, Израел - Чешка 98:61. Конечна табела: В. Британија 10 (4/2), Израел 9 (3/3), БиХ 9 (3/3), Чешка 8 (2/4). |
