Одличен прием на „Јас сум од Титов Велес“ во Франција
Филмот на Теона Митевска „Јас сум од Титов Велес“ по одличниот прием во францускиот печат, од денеска започнува со француската дистрибуција која ќе се одвива во осум градови низ Франција. „Јас сум од Титов Велес“ во Париз ќе се прикажува во три киносали. Во култното „Reflet Medicis“, каде што е закажана премиерата, на репертоарот ќе биде четири недели, а во останатиот дел од Франција филмот ќе се прикажува до крајот на мај.
„Јас сум од Титов Велес“ беше пречекан со одушевување во францускиот печат и беше најавен во повеќе од дваесет највлијателни весници и часописи во Франција. Во едно од највлијателните светски филмски списанија „Caxiers du cinema“, кое се смета за библија на светската кинематографија, започнато од француските автори Годар, Трифо и Шаброл, се вели: „Едно од најзачудувачките изненадувања на Канскиот фестивал 2008, а вклучен во АЦИД програмата, е вториот игран филм на Теона Митевска. Дистрибуцијата на филмот го потврдува мајсторството на младиот македонски филмски автор чија енергична визија и убавина го одзема здивот, вкоренета во минатото на поранешна Југославија за да може подобро да ги преиспита кинематографските можности, тематски и стилистички. „Јас сум од Титов Велес“ раскажува едноставна приказна, вадејќи на сцена три Чеховски преживувачи, сестри да бидам поточен, кои неможејќи да го дишат отровниот воздух на индустрискиот град што ги држи во стапица, одбираат да побегнат од својата секојдневна реалност... Теона Митевска со нејзиниот смисол за кадрирање, постојано внимание на соодносите, нејзиното знаење на спротивностите и нејзиниот вкус за нуркање во продлабоченоста, е филмски автор кој мора да се следи“. (К.Р.) |
