„Подземни соништа“ премиерно во Куманово
Театарот „Трајко Прокопиев“ од Куманово вечерва ќе ја одигра новата премиера „Подземни соништа“, која е работена според истоимениот текст, во режија на Благојче Божиновски. Главните улоги во „Подземни соништа“ ги толкуваат: Ивица Димитриевиќ, Јасмина Василева, Димитрија Доксевски - гостин од Скопје, а во епизодните улоги се појавуваат: Мирослав Петковиќ и Мартин Јовчевски.
„Ликовите во драмскиот текст ’Подземни соништа’ егзистираат во свет каде што не се почитуваат конвенционалните правила на однесување. Тоа е свет каде што реалноста на поединецот станува кошмар. Ликовите се затечени во историја (ситуација) напишана длабоко во нивните гени. За нив не постои случајност како след на нештата. Тие чекаат и копнеат како да (не) бидат заборавени. Егзистираат за да љубат и бидат љубени. Не постојат две исти убиства како што не постојат ни два исти соништа“. Ова е кусиот опис за претставата со која наедно се одбележува и прославува светскиот ден на театарот.
Костимите се на Благој Мицевски, додека сценографијата на Крсте Џидров. (К.Р.) |
