СВП ги промовира годинешните лауреати во Париз
По повод Светскиот ден на поезијата, завчера во седиштето на УНЕСКО во Париз, Манифестацијата „Струшки вечери на поезијата“ ги промовираше овогодинешните лауреати. Станува збор за словенечкиот автор Томаж Шаламун и Усман Сар - Сарус сенегалски поет, кој е добитник на наградата „Мостови на Струга“ за најдобра дебитантска книга.
Како што не' информираа од делегацијата со пригодно обраќање свеченоста ја отворил македонскиот амбасадор во Франција Јон Ивановски, поздравни говори одржале и амбасадорот на Словенија и сенегалскиот амбасадор во УНЕСКО, Јанез Шумрада и Папа Момар Диоп, а се обратила и Тереза Вагнер, координатор за културни активности на УНЕСКО. За творештвото на 28-годишниот сенегалски поет, кој пишува на француски јазик, говорел критичарот и рецензент на неговата прва книга универзитетскиот професор по литература Пиер Шартиер.
Во својата реч, сенегалскиот поет истакнал дека наградата „Мостови на Струга“ имаше голем одек во неговата земја, бидејќи тој е втор добитник на награда на СВП. Во 1975 година „Златниот венец“ на овој светски фестивал на поезијата го понесе поетот и претседател на Сенегал Леополд Седар Сенгор. „Голема е обврската и одговорноста, потенцирал Сарус, што ја чувствувам како поет пред сенегалската литература и култура по името на Сенгор.“ За творештвото на двајцата добитници свое обраќање имал и директорот на СВП Данило Коцевски.
Во преполната свечена сала на УНЕСКО, во присуство на истакнати личности од светската и француската културна сцена, била презентирана и поезија од Томаж Шаламун, кој важи за едно од најмаркантните имиња во современите светски поетски текови. (Н.П.) |
