Барса се извлече во Љубљана

Барселона стигна до победа 68:67 со кош на Наваро

Кошаркарите на Макаби во Тел Авив целата работа ја завршија веќе во првата четвртина што ја добија со 30:18. Домашните повторно го пронајдоа својот ритам на европската сцена и тука римјаните ништо не можеа, освен да се молат да не доживеат катастрофа.

Меѓутоа, молитвите не беа послушани, и на крај безмилосните Израелци застанаа на плус 41 (99:58).

Скорцанитис беше најефикасен поединец во тимот на Макаби со 19 поени, додека Елијах додаде 18.

Барселона во мечот со тимот на нашиот Влатко Илиевски, Олимпија, влезе како фаворит, иако се знае дека љубљанчаните оваа сезона прикажуваат феноменални партии. Европскиот првак на полувремето водеше со 36:26, но во третата четвртина следуваше студен туш на домашните кои со 28:16 ја вратија неизвесноста, а беа и на пат кон подвиг.

Малку недостасуваше Олимпија да победи. Кени Грегори на 40 секунди пред крајот погоди за 67:66, а тогаш Хуан Карлос Наваро, инаку најефикасниот на средбата со 27 коша, погоди за водство на Барса. Словенците инсистираа на тоа токму Грегори да направи пресврт за триумф, но во последните два напада прво промаши „тројка“, а потоа и за два поена. Нашиот интернационалец во редовите на Олимпија, Влатко Илиевски, за 38 минути игра постигна осум поени, имаше и најмногу асистенции - 6, еден скок и една украдена топка.

Светисла Пешиќ и Валенсија не успеаја од Истанбул да се вратат со ореол на победник, иако малку недостасуваше да се случи пресврт. Рака на срце, Фенербахче го заслужи триумфот (75:73) затоа што водеше во текот на целиот натпревар, а во некои моменти и со десет разлика. Најрасположен во турскиот тим беше Омар Онан со 22 коша, а кај Валенсија Душко Савановиќ погоди 11 коша.

Резултати:



Група Е: Каха Лаборал - Лиетувос Ритас 86:89, Панатинаикос - Уникаха 82:56.

Табела: Панатинаикос 2-0, Каха Лаборал 1-1, Ритас 1-1, Уникаха 0-2.

Група Ф: Макаби Рома 99:58, Олимпија - Барселона 67:68.

Табела: Барселона 2-0, Олимпија 1-1, Макаби 1-1, Рома 0-2.

Група Г: Монтепаски - Реал 68:78, Партизан - Ефес 76:79.

Табела: Реал 2-0, Ефес 2-0, Партизан 0-2, Монтепаски 0-2.

Група Ф: Жалгирис - Олимпијакос 64:71, Фенербахче - Валенсија 75:73.

Табела: Фенербахче 2-0, Валенсија 1-1, Олимпијакос 1-1, Жалгирис 0-2.