Словачка бара банкрот за презадолжените земји

„Прекумерно задолжените држави би требало да бидат принудени да банкротираат, а не да се спасуваат“, изјави премиерката на Словачка, Ивета Радичова, за „Волстрит журнал“.

Таа смета дека спасоносниот фонд на еврозоната најверојатно ќе предизвика повеќе проблеми, место да ги реши. Словачка годинава одби да учествува во заемот од вкупно 110 милијарди евра за презадолжената Грција, потсетува весникот. Братислава требаше да и' зајми на Грција 817,85 милиони евра, но словачкиот парламент одби да усвои таква мерка, иако одобри Словачка да се вклучи во спасоносниот фонд на еврозоната. Радичова повика на промени во институциите на ЕУ за да се спречат слични кризи како во Грција.

Еврозоната треба, според неа, да направи редовна стечајна постапка за државите кои не се способни да ги отплатуваат своите долгови.

Весникот ја означи како „невообичаено груба“ изјавата на еврокомесарот Оли Рен, кој по одлуката на словачкиот парламент наведе дека може само да жали за кршењето на солидарноста во еврозоната.

„Волстрит журнал“, повикувајќи се на аналитичари, напомна дека Словачка, како сиромашна држава, заговара цврсто постапување спрема Грција, бидејќи словачките банки, за разлика од германските и од француските, не се во Грција значајно финансиски ангажирани. Француските и германските банки, како што е наведено, имаат милијарди евра во грчки обврзници. (МИА)