Болт од Јамајка со нов светски рекорд на 100 м
Светскиот вицепрвак на 200 м победи во Њујорк со 9,72 сек., две стотинки подобро од рекордот на Пауел
Јамајканските спринтери во саботата го наелектризираа атлетскиот митинг „Рибок гран-при“ во Њујорк, каде што Јусеин Болт постави нов светски рекорд на 100 м, а Вероника Кемпбел-Браун истрча најдобро време сезонава во оваа дисциплина. Болт (21) ја „прелета“ стотката за 9,72 сек., две стотинки побрзо од досегашниот рекорд на сонародникот Асафа Пауел во септември минатата година. Светскиот вицешампион на 200 м „експлодира“ од стартната линија, веднаш стекнувајќи предност во однос на најголемиот конкурент Тајсон Геј од САД, кого на крајот го остави втор со 9,85 сек.
„Имав идеја дека би можел да истрчам светски рекорд“, изјави Болт по извонредната трка. „Бев многу самоуверен кога дојдов тука. Не се стремев за светски рекорд, но денеска ми дојде и го собрав“.
Брилијантната изведба на Болт ја круниса големата ноќ за Јамајка, во која светската шампионка Кемпбел-Браун победи со време 10,91 сек., две стотинки подобро од досега најдобриот резултат на 100 м во 2008 на Американката Елисон Феликс. Американката Џен Стуџински имаше три обида за поставување нов светски рекорд во скок со стап, но не успеа да прескокне 5,02 м, за дозволувајќи се со победа со 4,80 м.
Но, вечерта му припадна на Болт, кој чекаше еден час колку што беше одложен почетокот на митингот поради опасност од луња со громови, како и дополнителни 45 минути, колку што настанот беше во прекин поради громови и светкавици во областа. Но, кога воздухот се расчисти, настапи Болт. Спринтерот висок 1,96 м имаше проблеми на стартот, но одлично одреагира при повторениот почеток на трката поради грешка на друг учесник, експресно избивајќи пред Геј, од кого во ниту еден момент не беше загрозен.
„Ми беше мило за првиот неправилен старт“, прокоментира Болт. „Мојот прв старт не беше толку добар. Знаев дека ако го добијам Тајсон на стартот, сигурно ќе го победам. Мојот тренер ми рече да се концентрирам на трчањето по стартот и токму тоа го направив“.
Во почетокот од месецов Болт го вџаши атлетскиот свет кога истрча 9,76 сек. во Јамајка, во тој момент второ најдобро време на 100 м и само трета негова трка во оваа дисциплина. Геј беше коректен по поразот.
„Ова, дефинитивно, е извонредно за спортот“, рече тој. „Очигледно дека ќе имам работа. Токму сега, капа долу на Болт. Денеска беше негов ден“. |
