Претходен број

Македонски состојби

Ден на демократијата со загинат и ранети

Манчо Митевски

На највозвишениот ден на демократијата, денот на изборите, власта го жнееше тоа што го посеа!

Со оглед дека, поради технологијата на весникот, овој текст е пишуван пред да се знаат не само изборните резултати туку и излезноста на изборите, не знам која политичка коалиција победи. Меѓутоа, знам со сигурност кој загуби. На овие избори, посебно во изборната кампања загубија поголем дел од медиумите и новинарството, загуби македонската демократија со тезата на министерката за внатрешни работи дека најдемократскиот чин, кој во демократските општества е празник на демократијата, кај нас ќе го обезбедуваат рекорден број полицајци, специјалци и хеликоптери, а најмногу загубија државата Република Македонија и македонските граѓани!

Зошто најголемиот дел од македонските медиуми, пред се' телевизиите, а не заостанаа и некои печатени, се најголемите губитници на изборите? Затоа што по директива или поради сервилност кон своите сопственици кои речиси сите како партиски лидери влегоа на листата на коалицијата на ВМРО-ДПМНЕ, а некои што не влегоа, заедно со јавниот ТВ-сервис и' даваа пренагласена поддршка. За ова ќе имаат оправдување само во добивањето на најголемиот дел од огромниот финансиски колач што им го даде власта. Коалицијата „За подобра Македонија“ толку отворено го правеше ова, со цел, не бирајќи средства, да ги освои посакуваните 61 место во парламентот за себе и да и' помогне на ДПА на Тачи да победи кај албанскиот електорат и заедно да си владеат како што сакаат. Како што укажувавме уште во зародокот на идејата на ВМРО-ДПМНЕ за предвремени избори, токму тие високи и нереално поставени цели, посебно мотивот - парламент со што е можно помалку опозиција - доведоа до вчерашниот изборен ден исполнет со насилство. Епилогот е познат: до пладне еден загинат и деветмина повредени.

Вториот лош пристап на власта која ги организираше изборите беше фалењето дека со рекорден број полицијаци, специјалци и хеликоптери ќе обезбеди фер и демократски избори! По дефиниција, демократијата не се обезбедува со полиција. Напротив. Демократијата се обезбедува со помагање на демократските процеси и институции, со функционирање на правната држава и вледеењето на правото. Доколку МВР веднаш ги расчистеше предизборните оружени инциденти, а сторителите им ги предадеше на судовите, тогаш немаше да биде потребно рекордно учество на полицајци, специјалци и хеликопртери на денот на „слободното“ изјаснување на граѓаните. ДУИ целиот ден беше на работ од одлука за напуштањето на изборниот процес. Пукањата, стравот и настраданите се доказ дека на највозвишениот ден на демократијата, власта го „жнееше тоа што го посеа“!

Најзначајното прашање што се поставува е што ќе се случува со Македонија од моментот кога ќе се дознае епилогот од изборите. Има три алтернативи. Една, при приближно избалансиран изборен резултат на двете поголеми коалиции, да се направи широка демократска влада која ќе работи на условите за прием во ЕУ и на проблемот околу името со Грција, за да се фати последниот воз за НАТО, а по некое време да се одржат нови избори. Друга, ако победи коалицијата „Сонце за европска Македонија“, таа да си ги оствари ветувањата и за 6 месеци да ја внесе земјата во НАТО и да обезбеди датум за преговори со ЕУ. Третиот е победата на коалицијата „За подобра Македонија“ и на ДПА. Во тој случај се поставува равенка со многу непознати. Зашто, ниту се знае што ќе преземе околу главните прашања за земјата, приемот во НАТО, ЕУ и спорот со името, а над глава виси опасноста на која предупреди професорот Димитар Димитров во колумната во „Утрински“ дека ВМРО-ДПМНЕ „со предвремените избори атакува врз уставното уредување на државата, врз тројството на законодавна, извршна и судска власт, со пресликување на партиската шема, така што, покрај Владата - и Собранието да се претвори во егзекутива, да не се губи време со опозицијата“.