Секси вокалистки ја кренаа температура во клубот „Колосеум“

Бојан Шашевски

Почнаа подготовките за овогодинешниот фестивал „Таксират“, а со тоа стартуваа и промотивните концерти за големото декемвриско музичко случување. Најавата за второто гостување на францускиот арт-состав „Нувел Ваг“ донесе бранувања меѓу обожавателите во Македонија, па фановите уште одамна си купија билет повеќе и во средата го окупираа клубот „Колосеум“.

Преполниот „Колосеум“ го почувствува и пејачката Тања Царовска, која не можеше соодветно да ги изведе своите авторски и кавер теми од деби-албумот „No record of wrong“, па неколку пати ги замоли присутните да бидат потивки. Македонката, која живее и работи во Англија, Бојана Низамовска-Бомзич, овој пат се претстави во поинакво светло – во придружба на две гитари, оставајќи простор за гостите на вечерта.

Освен што измамија огромен аплауз и довикувања, „Нувел Ваг“ собраа еден куп луѓе пред и околу сцената, ја придвижија жедната публика кон шанковите, а ги наполнија и страничните сепариња и горната платформа на клубот. Нивната појдовната инспирација е култниот француски филмски бран од шеесеттите години, па со помош на персоналниот музички жаргон колективот демонстрираше соодветна интерпретација на своите њувејв влијанија. Водечкото дуо Оливие Либо и Марк Колин, придружено од двајца инструменталисти, но и двете атрактивни вокалистки, беа предуслов за интимно, но истовремено возбудливо пренесување на теми како „Just can't get enough“, „Love will tear us apart“, „God save the queen“, „This is not a love song“ итн. Двете девојките, облечени во кратки светкави фустачиња, постојано пееја, лежеа на подот, фрлија чаша во публиката, играа и скокаа, безрезервно импровизираа на сцената, притоа духовито задевајќи ја публиката со различни досетки за текстовите на песните, за љубов, алкохол, секс... Арт-групацијата, која е дел од движењето „Реобновување на француската шансона“, донесе два биса и десетминутно довикување од целиот клуб. По едно и полчасовното музичко доживување луѓето задоволни го напуштија клубот – некои што беа во можност да ги слушнат „Нувел Ваг“, а други што, конечно, земаа малку воздух од преполниот „Колосеум“.