Белграѓанки паднаа на фустаните на Секирарски

Македонскиот креатор ја претстави новата колекција есен/зима 2010/2011 на Модната недела во Белград

Македонскиот моден дизајнер Ненад Секирарски во вторникот ја претстави својата најнова колекција есен/зима 2010/2011 на модната недела во Белград „Фешн селекшн“, што се одржа во Кристалната сала на Домот на војската. Тој настапи на петтата вечер на 17. издание на „Јакобс фешн селекшн“, а неговите модели наидоа на одлична реакција кај публиката.

„Феноменалниот Македонец Ненад Секирарски и оваа година им даде предност на елеганцијата и на гламурот, па неговите преубави фустани од тантела и овој пат беа поздравени со голем аплауз од публиката во која имаше и многу познати личности“, пишува српски „Курир“.

Вечерта на која се претстави нашиот дизајнер беше насловена „Чиста десетка“, а на неа, покрај Секирарски, учествуваа и Василие Ковачев и Марина Миловановиќ, секој со свој индивидуален концепт. „На големо задоволство и воодушевување на белградската публика беа претставени модели инспирирани од стимпанкот како мотив во поголема смисла на зборот и секој модел како облека на ’војници што патуваат низ времето‘, создавајќи сопствен израз, прибирајќи различни мотиви од различни епохи. Моделите беа изработени во фини, лелеави материјали, како што се свила, нежна тантела и сатен, богати во волумен и рачна доработка, а како додатоци беа користени метални елементи во сребрена боја“, објаснуваат од ателјето „Секирарски“.