Поглед

Република во пламен!

Димитар Чулев

Пожелно би било Центарот за управување со кризи денес да лиферува соопштение во кое ќе потсети дека пожарите што се случуваа сношти низ Републиката не биле елементарна, туку строго контролирани појава „подметнати“ со намера да се задоволат не толку пироманските колку паганските страсти на дел од популацијата, која „огнено“ го празнува Бадник.

Која е врската на христијанскиот обичај (вечерта пред раѓањето на Исус да се стави и да се запали бадниково гранче во семејното огниште), со логорски огнови пред секоја станбена зграда, не е познато, но познати се намерите: онака, во зачадена атмосфера од кубиците што горат, барем накусо да се суспендира цивилизирано однесување, да се пие греана домашна ракија со црпалки од тенџериња за ајвар, онака одлепено да се сврти некое оро на турбофолк-нумера, која ечи од „појачалата“ што ги обезбедуваат маалските „клинци“ на кои во оваа пригода им е дозволено рамноправно да учествуваат во инфантилното однесување на нивните „старци“. Тие истите, кои наредниот ден се мамурни исто како кога треба да платат 100 денари за лифт и за чистачка во нивниот влез...

Ако е и традиционално – многу е, особено што е контра цивилизациското ниво, урбаната средина, актуелниот момент, конечно, против еколошките напори на планетарно ниво.

За оние што ќе се згрозат од напишаново, еден податок: Во Македонија еден хектар шума годишно расте (или дава) во просек 2,1 кубен метар дрвна маса. За оние 500 кубни метри што ќе изгорат вечерва, од пролет ќе треба да „сработат“ шумите на 250 хектари. По оваа брзина на растење на шумите, земјава е меѓу последните во Еврпопа. Само во Албанија, Кипар и на Малта шумите растат побавно. Па, има ли логика огнениот Бадник?