Вевчански карневал

Вевчанци подготвени за василичарски ѓурултии

Времето за неизбежниот Вевчански карневал, кој се претвори во нераскинлив белег и на македонската народна духовитост и иронија, „опасно“ се наближува. Од 12 јануари, вечерта, па се' до доцна попладне на Василица, 14 јануари, Вевчани повторно ќе се претвори во место каде што ќе владеат маските и ќе се случува еден „театар без ѕидишта“. И годинава, мотото на Вевчанци е „се' може да се одложи, само карневалот мора да се одржи“. Се најавува голема забава со македонски и балкански музички ѕвезди од „калибарот“ на Бајага.

Вевчанскиот карневал е еден од најуникатните културни настани во Македонија, кој традиционално се одржува на 13 и на 14 јануари и го слави доаѓањето на Новата година според стариот календар. Вевчанск��от карневал ги обединува сите изразни форми на нашата традиционална култура, трансформирајќи ги според потребите на современото општество со третирање теми од денешницата. Годинешниот карневал претставува спој на пагански обичаи, преведени на современ јазик.

Годинава, како и неколку години претходно, карневалот е организиран од агенцијата „Тетрагон“, во соработка со Општина Вевчани, а е поддржан од „Т- хоме“ и Министерството за култура. (Ј.П.)