Дивоградбите - по eдно евро за квадрат

Дивоградбите ќе може да се легализираат по едно евро за квадратен метар. Граѓаните ќе може да ја плаќаат легализацијата на 12 рати, по што, откако објектот ќе биде правно решен, ќе може да се откупи и дворното место, доколку земјиштето е во државна сопственост.

Вака одлучи Владата вчера, на првата седница во новата година. Одлуката веднаш ќе биде доставена во собраниска процедура, а се очекува да биде усвоена најдоцна до март годинава. Потоа, во наредните шест месеци граѓаните ќе можат да поднесуваат барање за легализирање на бесправно изградените објекти.

„Се одлучивме на овој чекор зашто дури до 95 отсто од дивоградбите се на лица што се со ниски примања, или корисници на социјална помош, што беше утврдено на трибините што се одржуваа во општините кога беше презентиран Законот“, рече премиерот Никола Груевски на вчерашната прес- конференција.

По едно евро квадрат ќе може да се легализираат дивоизградените објекти што имаат значење за државата и објекти наменети за производство, дистрибуција и сервиси (тешка и загадувачка индустрија, лесна и незагадувачка индустрија), како и индивидуални градби со висина до 10,2 метра. Исто така, ќе може да се легализираат и дивоизградените делови на објектите.

Груевски потенцираше дека со последните измени на Законот дивоградбите се сметаат како кривично дело, поради што не очекува во иднина да се практикува ваквиот вид градење. Тој појасни дека со Законот сега ќе можат да се легализираат и некои државни објекти што во минатото биле изградени без одобрение, како што е, на пример, Клиничкиот центар во Скопје.

Завчера со реакција околу Законот се јави и Асоцијацијата на архитекти на Македонија. Архитектите побараа од Владата да го повлече понуденото законско решение, кое, според нив, е неуставно, бидејќи сметаат дека отстапува од принципите на недискриминација и рамноправност. (Б.А.)