ММФ дојде во Македонија, што ни донесе?

Во наредните две недели мисијата на ММФ ќе престојува во редовна посета на земјава, во чии рамки ќе се разговара за отворениот кредит што Фондот и' го понуди на Македонија во вредност од 400 милиони евра. Шефот на мисијата на ММФ за Македонија, Вес Мекгру, пред средбата со вицепремиерот Зоран Ставрески не откри детали за условите под кои Македонија би го користела отворениот кредит од ММФ доколку го прифати, со образложение дека уште е рано за тоа. „Станува збор за редовни разговори од кои исходот ќе биде објавен по завршувањето на средбите со македонските претставници“, најави Мекгру.

Безусловната отворена кредитна линија во висина од 400 милиони евра на Македонија и' беше понудена за време на Годишното собрание на ММФ и Светска банка во Вашингтон, со поволна каматна стапка од 1,3 проценти годишно. Отворената кредитна линија е нов инструмент на ММФ што има цел да им помогне на земјите со здрави економски политики за полесно справување со кризата. Македонија е прва земја со која Фондот разговара за тој нов инструмент. Понудата од ММФ, Владата ќе ја оцени во консултации со експертската јавност и со стопанствениците. Доколку Владата се одлучи за неа, средствата би ги користела за реализација на политика за капитални инвестиции, за буџетска поддршка, како и за отплата на долгот кон странство. (А.С.)