Дали земјоделците добиваат субвенции

За да го планираат своето производство фармерите треба да знаат кога ќе ги добијат одобрените субвенции, поради што земјоделските здруженија вчера побараа од Министерството за земјоделство, во програмата за субвенционирање за 2011 година, да стави временска рамка за исплата на субвенциите.

„Иако е почната исплатата на дел од субвенциите, сепак, Федерацијата на фармери стравува дали субвенциите за сите мерки ќе бидат исплатени до крајот на годината“, изјави Андрија Секуловски, претседател на Федерацијата на фармери.

Исплатата на субвенциите е со утврдена динамика, вели првиот човек на Платежната агенција. Досега од двете програми се исплатени 43,5 проценти.

„Состојбата се следи. Имаше пролонгирање на некои рокови, ама тоа беше на барање на самите земјоделци, не постојат никакви проблеми за исплата на финансиската поддршка од Програмата за рурален развој и од Програмата за финансиска поддршка во земјоделството“, вели Тони Димовски, директор на Агенцијата за финансиска поддршка на земјоделството и рурален развој.

Од Платежната агенција велат дека ќе бидат земени предвид предлозите на земјоделските здруженија. А дали ќе се прифатат треба да одлучи Министерството за земјоделство. (Ек.Р.)