Денеска со турскиот „Мед“ се затвора „Синедејс“

Денеска во 20 часот во киното „Милениум“ со берлинскиот победник, турскиот филм „Мед“ на Семи Капланоглу и со доделување на наградите ќе се затвори 9. издание на Фестивалот на европски филм „Синедејс“. Топлата приказна „Мед“, за детето кое низ шумата го бара својот загубен татко, за разлика од канскиот победник што се прикажа на отворањето, би требало да донесе една поинаква атмосфера и на подобар начин да го заокружи годинешното издание. За наградите „Златна ѕвезда“ и „Сина ѕвезда“, кои се доделуваат во главната програма, како и „Златното сонце“ кое ќе го добие еден од филмовите од програмата „Балкан линк“, одлучува жирито предводено од Сањин Пејковиќ, чии членови се Влатко Галевски и Николас Гастер.

Инаку, програмата на фестивалот денес ќе започне во 15 часот во киното „Милениум“ со проекција на последното остварување од фокусот на италијански филм, „Генерација од илјада евра“ на Масимо Вениер. Во 18 часот на барање на гледачите во киното „Фросина“ репризно ќе се прикаже српскиот филм „Животот и смртта на порно бандата“ на Младен Ѓорѓевиќ, додека за 22 часот во ноќниот клуб „Балет“ е предвиден последниот дел од програмата на музичките документарци, која ќе ја заокружи „Астралис - инсталација“ на Игор Нелјак од Хрватска. (С.У.)