Ципи и мембрани на уметницата Елпида Хаџи-Василева

Во Промо центарот „Јавна соба“ вечерва прв пат во Македонија со самостојна изложба ќе се претстави ликовната уметница Елпида Хаџи-Василева.

Отворањето е закажано за 19 часот, а насловот на изложбата е „Инхерентна убавина“, која, според кустосот Ана Франговска, пледира кон создавањето специфична визуелна убавина чија есенција е токму во суштината за создавање убаво со грдо.

Кустосот, меѓу другото, вели дека станува збор за нова географија на уметноста во буквална и во преносна смисла.

„Објективната грубост, суровост, грдост на медиумот со кој се служи Хаџи-Василева (мембрани, опни или ципи од свински желудници) со преобразената природа т.е. метаморфозирани, со помош на раката на авторот, во уметничко дело добива нова, видоизменета субјективност, а оттука и нарација, која покрај општата има и индивидуална идејна симулација...“.

Елпида Хаџи-Василева е родена во Кавадарци, но веќе 19 години живее и работи во Лондон. Досега учествувала во павилјонот на Велика Британија на Венецијанското Биенале во 2005 година, а самостојно се претставувала во Англија, Франција, Италија, Ирска, Шкотска. Се смета за еден од најголемите таленти на денешнината, кој многу смело експериментира и умее на многу елегантен начин да ја шокира публиката.

По завршувањето во Скопје, изложбата до март ќе биде поставена во Музејот-галерија во Кавадарци. (К.Б.)