Тања Балаќ изложува во Приштина

Во Уметничката галерија во Приштина, Косово, вечерва во 19 часот ќе биде отворена самостојна изложба на македонската академска сликарка Тања Балаќ, каде што во траење две недели, пред тамошната публика ќе бидат презентирани 32 слики, создадени во последните три години. Балаќ се претставува со нов авторски циклус, кој според Маја Неделковска-Брзанова претставува своевидно надоврзување на веќе афирмираниот концепт во нејзиниот претходен циклус „Игра на присуство на отсутното“.

Ова 21 самостојно претставување на сликарката доаѓа по одржаните изложби во Македонија, Истанбул, Софија, Малме, Марибор, Москва, Париз и други. Реализирала и над 100 групни изложби во земјава и странство.

Тања Балаќ е претседателка на Друштво на ликовни уметници на Македонија од 2007 година. (К.Б.)