Гоце Смилевски денеска ќе ја прими европската награда за литература во Брисел

Во Кралскиот фламански театар во Брисел денеска во 19 часот на Гоце Смилевски ќе му биде врачена Наградата за литература на Европската унија. Ова високо признание што го доделува Европската комисија во соработка со Европската федерација на издавачи, Гоце Смилевски го доби за романот „Сестрата на Зигмунд Фројд“.

Наградата на Смилевски ќе му ја врачи комесарот за култура при Европската комисија Андроула Василиоу, а покрај младиот македонски автор добитници на наградата се по еден писател од Германија, Данска, Белгија, Финска, Луксембург, Романија, Кипар, Естонија, Словенија и Шпанија.

Со фрагменти од романот „Сестрата на Зигмунд Фројд“ минатата година Гоце Смилевски беше застапен во антологијата „Најдобра европска проза“ меѓу триесет истакнати писатели од европските литератури. Антологијата ја објави „Далкеј Аркајв Пресс“ од Чикаго, Соединетите Американски Држави, а неодамна Здружението за уметност и култура „Дијалог“ од Скопје објави ново издание на романот на Смилевски, кој прв пат се појави во 2007 година.

Гоце Смилевски е добитник на низа високи книжевни признанија, меѓу кои: наградата „Роман на годината“ на „Утрински весник“ за романот „Разговор со Спиноза“; Наградата на Австрискиот и Македонскиот ПЕН-центар за драмата „Три куси танцови чекори преку границата“; наградата на Централноевропската иницијатива за најдобар европски писател до 35 години; и сега – Наградата за литература на Европската унија за романот „Сестрата на Зигмунд Фројд“.

Романот „Разговор со Спиноза“, кој во Македонија доживеа пет изданија, е објавен и во Соединетите Американски Држави, Полска, Словенија и Хрватска, а „Архипелаг“ од Белград го презентираше во рамките на едицијата „100 словенски романи“. (Н.П.)